BAKI,VOA Orxan Qədirzadə

ABŞ-ın birinci xanımı Melaniya Tramp qısa müddətlik ictimaiyyət qarşısında görünmədikdən sonra Ağ Evdə keçirilən tədbirdə yenidən kameralar qarşısına çıxıb. Onun yoxluğu və prezident Donald Trampa yaxın köməkçilərdən biri ilə bağlı yayılan söz-söhbətlər son günlər diqqət çəkirdi.

Melaniya Tramp avqustun 20-də Ağ Evin Gül bağında keçirilən tədbirdə həyat yoldaşı Donald Trampla birlikdə iştirak edib. O, çıxışına zarafatla “Deyəsən, mənim üçün darıxmısınız. Mən də buradayam” sözləri ilə başlayıb.

Tədbir “İndyKar” yarış seriyası və “Fox Sports”un himayə sistemindən çıxan şəxslər üçün universitet təqaüdlərinin maliyyələşdirilməsinə ayırdığı ianənin elan olunması məqsədilə keçirilib.

Melaniya Tramp sonuncu dəfə iyulun 19-da futbol üzrə dünya çempionatının finalında ictimaiyyət qarşısına çıxmışdı. Bundan sonra o, Ağ Ev müxbirlərinin ikinci ənənəvi şam yeməyi də daxil olmaqla bir sıra tədbirlərdə iştirak etməyib.

“NBC”nin təhlilinə görə, Melaniya Tramp prezidentin ikinci hakimiyyət dövründə ilk prezidentlik müddətinin eyni mərhələsi ilə müqayisədə ictimai tədbirlərdə təxminən iki dəfə az iştirak edib.

Onun yenidən görünməsi Trampın icraçı köməkçisi Natali Harp ətrafında yaranan müzakirələrin fonuna təsadüf edib. ABŞ mediasında Harpın prezidentə qeyri-adi dərəcədə yaxın olduğu və ona çatan məlumatların seçilməsində mühüm rol oynadığı bildirilir.

Harp ilə Tramp arasında romantik münasibət olduğu barədə də şayiələr yayılıb. Lakin belə bir münasibətin mövcudluğunu təsdiqləyən etibarlı sübut yoxdur. Melaniyanın bu iddialardan narahat olduğu barədə məlumatlar da mediada yer alsa da, bunlar əsasən anonim mənbələrə əsaslanır və ailə daxilində təsdiqlənmiş fikir ayrılığı olduğunu göstərmir.