BAKI, VOA Orxan Qədirzadə

Norveç kralı V Haraldın səhhətinin xəstəxanada müalicə aldığı vaxt pisləşdiyi açıqlanıb. Kral sarayı 89 yaşlı monarxın müalicəyə cavab verdiyini, lakin səhhətinin ciddi nəzarətdə saxlanıldığını bildirib.

Kral sarayının yaydığı məlumata görə, V Harald qanda bakterial infeksiya səbəbindən antibiotik müalicəsi alır.

Kral ötən həftə Oslo Universitet Xəstəxanasına yerləşdirilib. Onun kortizon müalicəsi nəticəsində orqanizmdə maye yığılması ilə bağlı problem yaşadığı və iki həftəlik xəstəlik məzuniyyətinə çıxdığı bildirilib.

1991-ci ildən Norveç taxtında olan V Harald son illərdə bir sıra sağlamlıq problemləri ilə üzləşib. Buna baxmayaraq, kral dəfələrlə taxtdan imtina etmək niyyətində olmadığını açıqlayıb.

Kralın səhhətindəki problemlər Norveç kral ailəsinin digər çətinliklərlə üzləşdiyi dövrə təsadüf edir. Vəliəhd şahzadə Hakoonun həyat yoldaşı Mette-Marit mərhum amerikalı maliyyəçi Ceffri Epşteynlə əlaqələrinə görə tənqid olunur.

Bundan başqa, Mette-Maritin oğlu Marius Borq Hoiby iyun ayında zorlama və digər 32 ittiham üzrə 4 il müddətinə azadlıqdan məhrum edilib. O, məhkəmə qərarından apellyasiya şikayəti verib.