BAKI,VOA,Yusif Şərifzadə

ABŞ ordusu prezident Donald Trampın Hörmüz boğazı vasitəsilə İran limanlarına daxil olan və çıxan gəmilərə qarşı tətbiq etdiyi blokada çərçivəsində Ərəb dənizində 109 ticarət gəmisinin marşrutunun dəyişdirildiyini açıqlayıb.

VOA xəbər verir ki, məlumatda qeyd olunur ki, Hörmüz boğazı və Oman körfəzini əhatə edən blokada tədbirləri aprelin 13-də başlayıb və bu addım beynəlxalq enerji bazarlarında ciddi təsirlər yaradıb.

Məlumata əsasən, ABŞ hərbi qüvvələri bölgədə nəzarəti davam etdirir. Bu məqsədlə ABŞ-a məxsus bir neçə “Sea Hawk” helikopteri hazırda Ərəb dənizi üzərində patrul uçuşları həyata keçirir.

Hörmüz boğazı dünya enerji daşımalarının mühüm hissəsinin keçdiyi əsas marşrutlardan biri hesab olunur və burada yaranan hər hansı məhdudiyyət beynəlxalq ticarət və enerji bazarlarına birbaşa təsir göstərə bilər.

Eyni zamanda yayılan məlumatlarda qeyd olunur ki, mümkün sülh razılaşmasının ilkin çərçivəsinə əsasən İran 30 gün ərzində dəniz ticarətini müharibədən əvvəlki səviyyəyə qaytaracaq. Bunun müqabilində ABŞ-ın blokadanı dayandıracağı və hərbi qüvvələrini İran ətrafından geri çəkəcəyi iddia edilir.

Bununla belə, qeyd olunan məlumatlar tərəflər tərəfindən yekun razılaşma kimi təsdiqlənməyib.