BAKI,VOA,Yusif Şərifzadə

Hörmüz boğazından keçən tanker naməlum mərminin hədəfinə çevrilib. Böyük Britaniyanın Dəniz Ticarəti Əməliyyatları qurumunun məlumatına görə, zərbədən sonra gəmidə yanğın baş verib, lakin alov daha sonra söndürülüb.

VOA xəbər verir ki, hadisə avqustun 25-də yerli hakimiyyət orqanları tərəfindən qeydə alınıb, Böyük Britaniyanın Dəniz Ticarəti Əməliyyatları qurumu isə cümə axşamı bununla bağlı xəbərdarlıq yayıb. Tankerin bütün heyət üzvlərinin sağ və təhlükəsiz olduğu bildirilib.

Hadisənin hansı şəraitdə baş verdiyi və tankeri vuran mərminin mənşəyi hələlik müəyyən edilməyib. Aidiyyəti qurumlar məsələ ilə bağlı araşdırma aparırlar.

Böyük Britaniyanın Dəniz Ticarəti Əməliyyatları qurumu Hörmüz boğazından keçən gəmilərə yüksək ehtiyatlılıq nümayiş etdirməyi və şübhəli fəaliyyətlə bağlı dərhal məlumat verməyi tövsiyə edib. Bölgədə təhlükə səviyyəsi ağır olaraq qiymətləndirilib.

Hadisə strateji əhəmiyyət daşıyan Hörmüz boğazında gərginliyin yüksək olaraq qaldığı bir vaxta təsadüf edib. Boğaz dünya enerji daşımalarının əsas keçid məntəqələrindən biri hesab olunur.

Vaşinqton İrana qarşı dəniz mühasirəsinin davam etdiyini bildirir. Məlumata görə, mövcud vəziyyət nəticəsində Hörmüz boğazından gündəlik gəmi keçidlərinin sayı müharibədən əvvəlki dövrlə müqayisədə təxminən 95 faiz azalıb.