BAKI,VOA, Fərid Mikayılov

İran Prezidenti Məsud Pezeşkian müsəlman ölkələrini regional təhlükəsizliyin qorunmasında qarşılıqlı məsuliyyət nümayiş etdirməyə çağırıb. O bildirib ki, heç bir müsəlman ölkəsinin ərazisindən digər müsəlman dövlətinə qarşı hücum məqsədilə istifadə edilməməlidir.

VOA xəbər verir ki, Pezeşkian bu barədə Tehranda keçirilən 40-cı Beynəlxalq İslam Birliyi Konfransında çıxışı zamanı danışıb.

İran Prezidenti ölkəsinin regiondakı müharibəni başlamadığını və hücum edən tərəflərə qarşı müqavimət göstərdiyini bildirib.

“ABŞ və İsrail İrana qarşı müharibəyə başladılar”, – Pezeşkian deyib.

O, İranın qonşu ölkələrlə bağlı mövqeyini bir daha açıqlayaraq onların ərazilərindən Tehrana qarşı hərbi əməliyyatlar üçün istifadə edilməməli olduğunu vurğulayıb.

“Qonşularının təhlükəsizliyi hesabına heç bir müsəlman ölkəsi öz təhlükəsizliyini təmin etməyə çalışmamalıdır”, – İran Prezidenti bildirib.

Pezeşkian əlavə edib ki, heç bir müsəlman ölkəsinin ərazisi başqa bir müsəlman dövlətinə qarşı istifadə olunmamalıdır.

İran rəhbərliyi daha əvvəl də region ölkələrini öz ərazilərinin və hava məkanlarının İrana qarşı mümkün hərbi əməliyyatlarda istifadəsinə imkan verməməyə çağırıb.