BAKI, AzerVoice

İsrail, Böyük Britaniyanın Baş naziri Kir Starmerin Fələstin dövlətini tanımaq planları ilə bağlı bəyanatını rədd edib.

AzerVoice xəbər verir ki, bu barədə İsrail Xarici İşlər Nazirliyi açıqlama yayıb.

“İsrail, Böyük Britaniyanın Baş naziri tərəfindən verilmiş bəyanatı rədd edir. Fransa və daxili siyasi təzyiqlərin təsiri ilə Britaniya hökumətinin mövqeyini dəyişməsi, hazırda HƏMAS üçün bir mükafat, atəşkəs və girovların azad olunmasına yönəlmiş səylər üçün isə ciddi bir zərbədir” - deyə, açıqlamada bildirilib.

Xatırladaq ki, Kir Starmer, Böyük Britaniyanın, İsrailin Qəzza zolağında humanitar yardımın çatdırılmasına mane olacağı halda, sentyabr ayında BMT Baş Assambleyasının sessiyası ərəfəsində Fələstin dövlətini tanıyacağını bəyan edib.

Qeyd edək ki, Fələstin BMT-nin 148 üzv dövləti tərəfindən tanınıb. 95 ölkədə Fələstinin səfirlikləri və daimi nümayəndəlikləri fəaliyyət göstərir. “İki dövlət – iki xalq üçün” prinsipi 1967-ci il sərhədləri daxilində, paytaxtı Şərqi Qüds olan müstəqil Fələstin dövlətinin yaradılmasını nəzərdə tutur.