BAKI,VOA, Nailə Babazadə

Suriya rəsmiləri ABŞ-İsrail və İran arasındakı münaqişə səbəbindən bir neçə həftəlik fasilədən sonra mayın birindən etibarən Doha və Ciddədən Dəməşq Beynəlxalq Hava Limanına uçuşların bərpa ediləcəyini elan ediblər.

VOA xəbər verir ki, Suriya Mülki Aviasiya və Hava Nəqliyyatı Baş İdarəsinin verdiyi məlumata görə "Qatar Airways" Dohadan Dəməşqə hər gün müntəzəm reyslər həyata keçirəcək. Eyni zamanda Səudiyyə Ərəbistanının "Flynas" aviaşirkəti də gələn həftənin cümə günündən etibarən Ciddədən Suriyanın paytaxtına həftədə üç uçuş reallaşdıracağını təsdiqləyib.

İdarənin media ofisinin rəhbəri Mustafa Xeyrullah bu addımın regional əlaqələrin gücləndirilməsi istiqamətində mühüm bir mərhələ olduğunu bildirib. SANA xəbər agentliyinə danışan rəsmi uçuşların bərpasının regionda təhlükəsizlik vəziyyətinin yaxşılaşması fonunda Dəməşq Beynəlxalq Hava Limanında hava nəqliyyatının bərpasına böyük töhfə verəcəyini vurğulayıb. Suriya aprel ayının əvvəlində ABŞ və İran arasında əldə olunan atəşkəs razılaşmasından sonra hava məkanını yenidən açaraq hava hərəkətini qismən bərpa etmişdi.

Ölkənin ən böyük hava limanı olan Dəməşq Beynəlxalq Hava Limanı paytaxtı şimaldakı Hələb kimi digər daxili şəhərlərlə də birləşdirir. 2024-cü ilin dekabrında Bəşər Əsəd rejiminin devrilməsindən sonra hava limanının fəaliyyətində tədricən bərpa prosesi müşahidə olunur. Beynəlxalq uçuşların artması ölkənin həm iqtisadi dirçəlişi həm də xarici ölkələrlə diplomatik və mülki əlaqələrinin normallaşması baxımından strateji əhəmiyyət kəsb edir.