BAKI,VOA,Yusif Şərifzadə
Braziliya Prezidenti Luiz İnasio Lula da Silva ilə ABŞ Prezidenti Donald Tramp arasında telefon danışığı olub. Liderlər Vaşinqtonun Braziliya məhsullarına tətbiq etdiyi yeni gömrük tariflərini və iki ölkə arasında yaranmış ticarət mübahisəsinin həlli yollarını müzakirə ediblər.
VOA xəbər verir ki, Braziliya hökumətinin yaydığı məlumata görə, Lula telefon danışığı zamanı mövcud fikir ayrılıqlarının aradan qaldırılması üçün danışıqların ən yaxşı yol olduğunu bildirib. Tramp isə iki ölkənin rəsmilərinin mümkün qədər tez görüşməsini təklif edib.
ABŞ hökuməti ötən ay bəzi Braziliya məhsullarına ədalətsiz ticarət praktikaları ilə bağlı iddiaları əsas gətirərək 25 faiz gömrük tarifi tətbiq edib. Bundan əlavə, məcburi əməyə qarşı qadağaların lazımi səviyyədə icra edilməməsi ilə bağlı iddialar əsasında Braziliya da daxil olmaqla onlarla ölkədən gətirilən bəzi məhsullara 12,5 faizlik tariflər müəyyənləşdirilib.
Lula bildirib ki, yeni tariflər həm Braziliya, həm də ABŞ iqtisadiyyatına zərər verə bilər. Braziliya prezidenti Vaşinqtonun tarifləri əsaslandırmaq üçün irəli sürdüyü bir sıra iddiaları əsassız adlandırıb.
ABŞ tərəfinin narahatlıqları arasında meşələrin qırılması, əqli mülkiyyət hüquqları, korrupsiya, Braziliyanın “Pix” ani ödəniş sistemi, etanol və məcburi əməklə əlaqəli olduğu iddia edilən idxal məsələləri yer alır. Lula bu arqumentlərin ABŞ-nin tarif tədbirlərinə əsas vermədiyini bildirib.
Braziliya avqustun əvvəlində ABŞ-nin tariflərinə cavab olaraq qarşılıqlılıq mexanizmi çərçivəsində prosesə başlayıb. Bu addım ABŞ-nin ticarət qurumları ilə əlavə məsləhətləşmələrə, nəticə əldə olunmadığı halda isə Vaşinqtona qarşı cavab tədbirlərinə gətirib çıxara bilər.
Telefon danışığında təhlükəsizlik məsələləri də müzakirə olunub. Lula Braziliyanın mütəşəkkil cinayətkarlıqla mübarizədə ABŞ ilə əməkdaşlıq etməkdə maraqlı olduğunu bir daha vurğulayıb.
Bununla belə, Braziliya prezidenti ölkəsində fəaliyyət göstərən cinayətkar qruplaşmaların terror təşkilatları ilə eyniləşdirilməsinə qarşı çıxıb. ABŞ may ayında Braziliyada fəaliyyət göstərən iki cinayətkar qruplaşmaya terror təşkilatı statusu tətbiq edib.