BAKI, VOA

Leonardo da Vinçinin məşhur “Mona Liza” əsərinin oğurlandığı 1911-ci ildə yalnız rəsm əsərinin nümayiş olunduğu Luvr muzeyində aparılan yoxlama zamanı məlum olub.

Hadisə günü həvəskar rəssam Luvrda “Mona Liza”nın qarşısında rəsm çəkərkən əsərin yerində olmadığını görüb. Araşdırma nəticəsində müəyyən edilib ki, muzeyin keçmiş əməkdaşı italiyalı Vinçenzo Peruccia rəsmi divardan çıxararaq paltarının altında gizlədib və muzeydən uzaqlaşıb.

Oğurluq Fransada böyük səs-küyə səbəb olub. Rəsmin yoxa çıxmasından sonra müxtəlif fərziyyələr irəli sürülüb. Hətta Parisdə əsərin Fransanı alçaltmaq məqsədilə almanlar tərəfindən oğurlandığı barədə şayiələr yayılıb.

Araşdırmaçılar iki ildən artıq müddətdə “Mona Liza”nın izinə düşə bilməyiblər. 1913-cü ilin noyabrında italiyalı sənət taciri Alfredo Geriyə özünü “Leonardo” adlandıran şəxsdən məktub daxil olub. Məktubda əsərin Florensiyada olduğu və böyük məbləğ qarşılığında geri qaytarıla biləcəyi bildirilib.

Peruccia fidyə almağa çalışarkən həbs edilib və rəsm əsəri zədələnmədən tapılıb. O, oğurluğu İtaliyanın milli maraqlarını qorumaq məqsədilə etdiyini iddia etsə də, əvvəlki məhkumluğu və sənət kolleksiyaçılarının siyahısının olduğu gündəliyi onun əsas məqsədinin pul qazanmaq olduğunu göstərib.

Peruccia bir il həbs cəzasına məhkum edilsə də, cəmi yeddi ay sonra azadlığa buraxılıb. “Mona Liza” isə Luvra qaytarılıb və bundan sonra muzeydə təhlükəsizlik tədbirləri gücləndirilib.