BAKI,VOA, Nailə Babazadə

İranın yarı rəsmi "Tasnim" xəbər agentliyinin yaydığı məlumata görə, Tehranın Pakistanda keçiriləcək müzakirələrdə iştirak etməmək barədə qəbul etdiyi ilkin qərarda hazırkı vaxta qədər heç bir dəyişiklik baş verməyib.

VOA xəbər verir ki, xəbərdə vurğulanır ki, ABŞ-ın vitse-prezidenti Ceyms Devid Vensin (JD Vance) İslamabaddakı görüşlərə qatılacağı ilə bağlı yayılan məlumatlar belə, İranın prinsipial mövqeyini dəyişdirmək üçün yetərli olmayıb.

İran tərəfi müzakirə masasına oturmamasının əsas səbəbi kimi Hörmüz boğazında ABŞ donanması tərəfindən davam etdirilən dəniz blokadasını göstərir. Tehran rəsmiləri bu addımı atəşkəs rejiminin pozulması kimi qiymətləndirirlər. Bundan əlavə, Vaşinqtonun nümayiş etdirdiyi "həddindən artıq və qeyri-real" tələblərin danışıqlar prosesinin növbəti mərhələsi üçün ciddi maneə təşkil etdiyi bildirilir.

Qeyd edək ki, Pakistan rəhbərliyinin və Baş Qərargah rəisi Asım Munirin bölgədə gərginliyi azaltmaq və tərəfləri bir araya gətirmək istiqamətindəki intensiv vasitəçilik səylərinə baxmayaraq, Tehran blokada tamamilə aradan qaldırılmadan diplomatik dialoqun bərpasını mümkün hesab etmir. Hazırda İslamabadda ABŞ nümayəndə heyətinin olmasına baxmayaraq, İran tərəfinin masada təmsil olunub-olunmayacağı qeyri-müəyyənliyini qoruyur.