BAKI,VOA, Nailə Babazadə

Türkiyənin Ədliyyə naziri Akın Gürlek, Qəzzaya humanitar yardım daşıyan "Sumud" donanmasına qarşı İsrail tərəfindən həyata keçirilən hücumla bağlı hazırlanan ittihamnamənin qəbul edildiyini və mühüm bir məhkəmə prosesinin başladığını elan edib.

VOA xəbər verir ki, nazir öz sosial media hesabında paylaşım edərək, bu prosesin beynəlxalq hüquq müstəvisində tarixi bir əhəmiyyət kəsb etdiyini vurğulayıb.

Nazir Gürlek qeyd edib ki, İstanbul Respublika Baş Prokurorluğu tərəfindən aparılan bu təhqiqatın məhkəmə mərhələsinə gəlib çatması Türk ədalətinin qərarlı iradəsinin göstəricisidir. O, Türkiyənin təkcə diplomatiya sahəsində deyil, həm də hüquq zəminində zülmə qarşı duruşunu ortaya qoyduğunu bildirib: "Prezidentimiz Rəcəb Tayyib Ərdoğanın güclü liderliyi ilə Türkiyə Cümhuriyyəti Dövləti bu duruşunu açıq və net şəkildə nümayiş etdirir".

Açıqlamada İsrailin Baş naziri Benyamin Netanyahu və rəhbərlik etdiyi qrupun mülki şəxslərə qarşı sistematik hücumlar, bəşəriyyətə qarşı cinayətlər, soyqırım, işgəncə və talançılıq kimi ağır əməllərinə görə hüquq qarşısında mütləq cavab verəcəyi qeyd olunub. Gürlek "Heç kim işlədiyi cinayətin ağırlığını tutduğu vəzifənin arxasında gizlədə bilməz" deyərək sərt xəbərdarlıq edib.

Ədliyyə Nazirliyi olaraq insanlığın ortaq vicdanını yaralayan hər bir hərəkətin təqibçisi olacaqlarını bildirən nazir, ədalətin bərqərar olması üçün hüquq çərçivəsində mübarizəni qətiyyətlə davam etdirəcəklərini bəyan edib.