BAKI, AzerVoice
Misir Yaxın Şərqdə gərginliyin azaldılması və eskalasiyanın qarşısının alınması istiqamətində diplomatik səylərini davam etdirir.
AzerVoice-un məlumatına görə, Qahirə, İran və İsrail arasında tam atəşkəsin təmin edilməsinin zəruriliyini vurğulayaraq, İranın nüvə proqramı ilə bağlı danışıqların yenidən başlamasının əhəmiyyətini bir daha gündəmə gətirib.
Misir Xarici İşlər Nazirliyinin verdiyi açıqlamaya əsasən, çərşənbə günü Misirin xarici işlər naziri Bədr Əbdül-Ati, İran xarici işlər naziri Seyid Abbas Əraqçi, ABŞ prezidentinin Yaxın Şərq üzrə xüsusi nümayəndəsi Stiven Uitkoff və Atom Enerjisi üzrə Beynəlxalq Agentliyin (AEBA) baş direktoru Rafael Qrossi ilə telefon danışıqları aparıb.
Söhbət zamanı tərəflər İranın nüvə proqramı ilə bağlı danışıqların bərpasının və bölgədəki bütün böhranların siyasi yollarla həllinin vacibliyini vurğulayıblar. Əbdül-Ati, həmçinin İran və İsrail arasında atəşkəsin tam şəkildə tətbiq olunmasının və gərginliyin yenidən alovlanmaması üçün siyasi yollarla irəliləməyin zəruriliyini bildirib.
Danışıqlar zamanı tərəflər arasında bölgədə eskalasiyanın azaldılması, hərbi toqquşmaların qarşısının alınması və siyasi proseslərin gücləndirilməsi üçün fikir mübadiləsi aparılıb.
Xatırladaq ki, keçən ayın sonunda Əbdül-Ati ilə Qrossi arasında keçirilən telefon danışığında Misirli XİN İranın nüvə problemi ilə bağlı diplomatik həll yollarının üstün tutulmasının bölgədə sabitliyin və təhlükəsizliyin təmin olunmasına mühüm töhfə verəcəyini vurğulamışdı.
Qrossi isə həmin vaxt Misir Prezidenti Əbdülfəttah əs-Sisinin İranın nüvə məsələsinin sülh yolu ilə həll olunması istiqamətində göstərdiyi dəstəyi yüksək qiymətləndirmiş və Misirin nüvə silahlarının yayılmasının qarşısının alınması təşəbbüslərinə verdiyi töhfələri təqdir etmişdi. O, həmçinin Yaxın Şərqdə nüvə silahlarından və digər kütləvi qırğın silahlarından azad bir bölgə yaradılması ideyasını dəstəklədiyini qeyd etmişdi.
Bundan əvvəl, iyun ayının əvvəlində Qahirədə keçirilən görüşdə Əbdül-Ati ilə Qrossi arasında AEBA-nın bölgədəki sabitliyə verdiyi töhfələr, nüvə texnologiyalarının dinc məqsədlərlə istifadəsinin genişləndirilməsi və bu texnologiyaların davamlı inkişaf məqsədlərinə xidmət etməsi barədə müzakirələr aparılmışdı.
Nazir o vaxt Misirin həm regional, həm də beynəlxalq səviyyədə nüvə silahlarının yayılmasının qarşısının alınması və nüvə enerjisinin sülh məqsədilə istifadəsi sahəsindəki fəaliyyətini vurğulayaraq, Misirin bu istiqamətdə qabaqcıl mövqedə olduğunu bildirmişdi. O, həmçinin Yaxın Şərqdə nüvə silahlarının yayılmasına dair müqavilə çərçivəsində ölkələrin öhdəliklərinin pozulmasının bölgədə sabitliyi daha da pozduğuna diqqət çəkmişdi.