BAKI,VOA, Fərid Mikayılov

Qətər ABŞ və İran arasında gərginliyin azaldılması istiqamətində diplomatik səylərini davam etdirdiyini və əsas prioritetlərinin gərginliyin aradan qaldırılması, tərəflərin yenidən danışıqlar masasına qayıtması, eləcə də Hörmüz boğazının sərbəst gəmiçilik üçün açılması olduğunu bəyan edib.

VOA Bu barədə Qətər Xarici İşlər Nazirliyinin sözçüsü Məcid əl-Ənsari Dohada keçirilən mətbuat konfransında bildirib.

Onun sözlərinə görə, Doha bölgədə gərginliyin dayandırılması məqsədilə tərəflərlə intensiv diplomatik təmaslar aparır.

"Prioritetimiz gərginliyi mümkün qədər tez dayandırmaq, diplomatik prosesə qayıtmaq və Hörmüz boğazını əvvəlki kimi sərbəst dəniz nəqliyyatı üçün yenidən açmaqdır", – deyə Ənsari bildirib.

Qətər rəsmisi qeyd edib ki, Hörmüz boğazının açılması ilə bağlı hələlik yekun razılaşma əldə olunmayıb. Bununla belə, tərəflər arasında razılaşma layihələrinin mübadiləsi aparılır və diplomatik danışıqlar davam edir.

Ənsari vurğulayıb ki, Qətər vasitəçi kimi İran və ABŞ-ı yenidən danışıqlar masasına qaytarmağa çalışır.

"Hazırda hər hansı razılaşma yoxdur. Əsas məqsədimiz diplomatik prosesin bərpasıdır", – deyə o əlavə edib.

Qətər XİN sözçüsü bildirib ki, Hörmüz boğazında gəmiçiliyin əvvəlki vəziyyətinə qaytarılması ilə bağlı qərarlar region ölkələrinin iştirakı ilə müzakirə edilməlidir.

Qəzzadakı vəziyyətə toxunan Ənsari qeyd edib ki, Qətər, Misir və Türkiyə atəşkəs razılaşmasının ikinci mərhələsinin həyata keçirilməsi üçün səylərini davam etdirir.

O, İsrailin Qəzzada son hərbi əməliyyatlarının atəşkəs razılaşmasının icrasına mane olmağa yönəldiyini iddia edib və beynəlxalq ictimaiyyəti İsrailin öhdəliklərini yerinə yetirməsi, eləcə də Qəzza zolağından çıxması üçün təzyiq göstərməyə çağırıb.

Ənsari həmçinin bildirib ki, Qətər, Türkiyə və Misir İsrailin mülki şəxslərin, o cümlədən qadın və uşaqların həlak olması ilə nəticələnən hücumlarını pisləyir və bu addımların gərginliyin azaldılması səylərinə mənfi təsir göstərdiyini hesab edir.