BAKI,VOA,Yusif Şərifzadə

İran parlamentinin sədri və ölkənin danışıqlardakı əsas nümayəndələrindən biri Məhəmməd Baqir Qalibaf Tehranda Qətərin Baş naziri və xarici işlər naziri Məhəmməd bin Əbdürrəhman bin Casim Al Tani ilə görüşüb.

VOA xəbər verir ki, görüş zamanı Qalibaf bölgədə gərginliyin azaldılmasının vacibliyini vurğulayıb. Tərəflər Yaxın Şərqdə mövcud vəziyyət və son hadisələrlə bağlı fikir mübadiləsi aparıblar.

İranın “Təsnim” xəbər agentliyinin məlumatına görə, görüşdə bölgədə qarşıdurmanın səviyyəsinin aşağı salınması istiqamətində göstərilən səylər əsas müzakirə mövzularından biri olub.

Qalibaf və Al Tani dialoqun yenidən başlanması üçün uyğun şəraitin yaradılması imkanlarını da nəzərdən keçiriblər. Tərəflər mövcud gərginliyin diplomatik vasitələrlə azaldılması istiqamətində atıla biləcək addımları müzakirə ediblər.

Görüş Qətərin Baş nazirinin Tehrana səfəri çərçivəsində baş tutub. Doha bölgədəki gərginliyin azaldılması və tərəflər arasında danışıqların bərpası istiqamətində diplomatik səylərini davam etdirir.