BAKI,VOA,Yusif Şərifzadə

İranın neft naziri Möhsün Paknejad bildirib ki, ABŞ-nin İran limanları və gəmilərinə qarşı tətbiq etdiyi mühasirəyə baxmayaraq, ölkənin xam neftinin dünya bazarlarına satışı dayanmayıb.

VOA xəbər verir ki, Paknejad İran dövlət televiziyasına açıqlamasında neft tədarükünün əvvəlki dövrlə müqayisədə azaldığını təsdiqləyib. Bununla belə, nazir İran neftinin xarici bazarlara çatdırılmasının davam etdiyini vurğulayıb.

Paknejad neft ixracının həcmi, istifadə olunan daşınma yolları və satışların həyata keçirilməsi ilə bağlı ətraflı məlumat verməkdən imtina edib.

İranın neft naziri bunun səbəbini açıqlayarkən belə məlumatların “düşmən tərəfindən istifadə oluna biləcəyini” bildirib. Bu səbəbdən Tehran neft ixracının hansı yollarla davam etdirilməsi barədə məlumatları açıqlamır.

Nazirin açıqlamasına əsasən, ABŞ-nin İran limanları və gəmilərinə qarşı tədbirləri ölkənin neft tədarükünün həcminə təsir göstərsə də, ixracı tamamilə dayandıra bilməyib.

Neft ixracı İranın xarici valyuta gəlirlərinin əsas mənbələrindən biri olduğundan, satışların davam etdirilməsi ölkə iqtisadiyyatı üçün mühüm əhəmiyyət daşıyır.