BAKI,VOA,Yusif Şərifzadə

Pakistan yeni imzalanmış müdafiə və hərbi əməkdaşlıq sazişi çərçivəsində Küveytin silahlı qüvvələrinin hazırlanmasına və hərbi imkanlarının gücləndirilməsinə kömək edəcək. Razılaşma Küveytin müdafiə nazirinin Pakistana səfəri zamanı rəsmiləşdirilib.

VOA xəbər verir ki, Pakistanın dövlət televiziyasının məlumatına əsasən, ölkənin silahlı qüvvələri Küveyt hərbçilərinin təliminə və müdafiə imkanlarının artırılmasına dəstək göstərəcək.

Saziş çərçivəsində Pakistanın Küveytə sərhədlərin idarə olunması sahəsində də yardım göstərməsi nəzərdə tutulur. Bundan başqa, tərəflərin qarşılıqlı razılaşdıracağı digər müdafiə sahələrində də əməkdaşlıq həyata keçiriləcək.

Razılaşmanın iki ölkənin silahlı qüvvələri arasında təcrübə mübadiləsinin genişləndirilməsinə, hazırlıq səviyyəsinin yüksəldilməsinə və müdafiə əlaqələrinin möhkəmləndirilməsinə xidmət edəcəyi bildirilir.

Yeni saziş bölgədə hərbi gərginliyin yüksək olduğu bir dövrdə imzalanıb. İran müharibə zamanı ABŞ-nin Küveytdəki Əhməd əl-Cabir hərbi obyektlərini dəfələrlə hədəfə alıb.

Tehran həmin hücumları ABŞ-nin İrana endirdiyi zərbələrə cavab kimi təqdim edib. Mövcud təhlükəsizlik şəraiti fonunda Küveytin müdafiə imkanlarının və hərbi hazırlığının gücləndirilməsi xüsusi əhəmiyyət qazanıb.