BAKI,VOA,Yusif Şərifzadə

İsrail qüvvələri işğal altındakı İordan çayının qərb sahilində, Qüdsün şimal-qərbində yerləşən bir neçə Fələstin yaşayış məntəqəsində hərəkət məhdudiyyətlərini sərtləşdirib. Yeni tədbirlər Nəbi Səmuil, Beyt İksa və Xəlailə bölgələrinin sakinlərini əhatə edir.

VOA xəbər verir ki, Fələstinin rəsmi xəbər agentliyinin məlumatına görə, həmin ərazilərdə yaşayan fələstinlilərdən evlərinə gedib-gəlmək üçün xüsusi icazə almaları tələb olunur. Yeni qaydaların yaşayış məntəqələrinin ətraf ərazilərlə əlaqəsini daha da məhdudlaşdırdığı bildirilir.

Qüds valiliyinin məlumatına əsasən, məhdudiyyətlər Xəlailə məhəlləsi, Beyt İksa və Nəbi Səmuil kəndlərinin sakinlərinin gündəlik hərəkət imkanlarına təsir göstərir.

Beyt İksada təxminən 10 sakinin son iki gündür evlərinə qayıda bilmədiyi bildirilir. Onlardan bəzilərinə lazımi icazələrinin olmadığı, digərlərinə isə İsrail tərəfinin tətbiq etdiyi “təhlükəsizlik qadağası” səbəbindən keçidə icazə verilmədiyi qeyd olunur.

Məlumata görə, Beyt İksa İsrail hərbi nəzarət məntəqəsinin arxasında yerləşir və kəndə giriş xüsusi nəzarət altında həyata keçirilir. Ötən ilin sonlarında sakinlərdən əraziyə daxil olmaq üçün xüsusi maqnit kartları almaları da tələb olunub.

Sakinlərdən Məhəmməd Zayed bildirib ki, nəzarət məntəqəsi bir müddət tamamilə bağlanıb. Sonradan keçid açılsa da, bəzi sakinlərə adlarının giriş icazəsi verilən şəxslərin siyahısından çıxarıldığı bildirilib.

Məhdudiyyətlərin sərtləşdirilməsi Qüdsün şimal-qərbində yerləşən Fələstin yaşayış məntəqələrinin təcridini daha da artırır və sakinlərin gündəlik həyatını çətinləşdirir.