BAKI,VOA,Yusif Şərifzadə

Avstraliya Milli Universitetinin müəllimi Aləm Salehin fikrincə, NATO-nun ABŞ ilə birlikdə Hörmüz boğazının açılması istiqamətində hərbi əməliyyata qoşulması üçün alyansın fəaliyyət fəlsəfəsi tamamilə dəyişməlidir.

VOA xəbər verir ki, Aləm Saleh bildirib ki, İran bu müharibəni öz mövcudluğuna yönəlmiş təhlükə kimi qiymətləndirib. Onun sözlərinə görə, ABŞ Prezidenti Donald Trampın açıqlamalarına əsasən, məqsəd İran dövlətini zəiflətmək idi, lakin Tehran bunun qarşısını almağa nail olub.

Təhlilçi qeyd edib ki, Donald Tramp nə müharibə dövründə, nə də ondan sonra NATO müttəfiqlərini ABŞ-ın mövqeyini dəstəkləməyə inandıra bilməyib. Onun fikrincə, Ankarada keçirilən NATO Zirvə Toplantısında da alyans üzvlərinin ABŞ-ın rəhbərlik etdiyi mümkün koalisiyaya qoşulması real görünmür.

Aləm Saleh vurğulayıb ki, NATO müdafiə xarakterli hərbi alyansdır və onun kollektiv təhlükəsizlik mexanizmi əsasən üzv ölkələrin coğrafi təhlükəsizliyinə yönəlib. O bildirib ki, ABŞ ilə birlikdə Hörmüz boğazında hərbi əməliyyatlara qoşulmaq üçün alyans müdafiə təşkilatından hücum xarakterli və qlobal missiyalar həyata keçirən quruma çevrilməlidir.

Təhlilçinin sözlərinə görə, belə bir dəyişiklik hazırkı şəraitdə mümkün görünmür.