BAKI,VOA,Yusif Şərifzadə

ABŞ İrana və onun iqtisadi fəaliyyətinə yardım etdiyi bildirilən tərəflərə qarşı yeni genişmiqyaslı sanksiyalar paketini elan edib. ABŞ maliyyə naziri Skott Bessent bildirib ki, tədbirlər İranın dünya üzrə maliyyə əlaqələrini zəiflətməyə və ölkənin əsas gəlir mənbələrinə çıxışını məhdudlaşdırmağa yönəlib.

VOA xəbər verir ki, Bessent bazar ertəsi keçirdiyi mətbuat konfransında Vaşinqtonun İranın beynəlxalq maliyyə əlaqələrinə qarşı geniş iqtisadi təzyiq kampaniyasına başladığını açıqlayıb.

“İranın bütün dünyadakı maliyyə əlaqələrinə qarşı iqtisadi hücuma başlayırıq. Məqsədimiz Tehran tək qalana qədər bu rejimi ayaqda saxlayan bütün iqtisadi həyat xətlərini kəsməkdir”, – Bessent bildirib.

ABŞ Maliyyə Nazirliyinin məlumatına görə, yeni tədbirlər İran iqtisadiyyatı üçün əhəmiyyət daşıdığı bildirilən beş əsas sahəni əhatə edir. Bunlar rəqəmsal aktivlər, texnologiya, qızıl, aviasiya və gəmiçilik sahələridir.

Nazirlik, həmçinin 60-a yaxın qurum, fiziki şəxs və gəmini sanksiya siyahısına daxil edib. Vaşinqton həmin tərəflərin İranın iqtisadi və maliyyə fəaliyyətlərinin davam etdirilməsinə yardım etdiyini bildirir.

Bessent İranla iqtisadi münasibətlər saxlayan xarici tərəflərə də sərt xəbərdarlıq edib. Onun sözlərinə görə, bundan sonra İranla əlaqələrdə qeyri-müəyyən hüquqi və iqtisadi imkanlardan istifadə etmək qəbuledilməz hesab ediləcək.

“ABŞ-nin mövqeyi ilə bağlı heç bir qeyri-müəyyənlik qalmasın”, – Bessent deyib.

ABŞ maliyyə naziri İranla “istənilən növ iqtisadi əməkdaşlığın” buna görə məsuliyyət daşıyan tərəfləri ABŞ-nin bütün iqtisadi və maliyyə təzyiq imkanları ilə üz-üzə qoya biləcəyini bildirib.

Yeni sanksiyalar Vaşinqtonun təzyiq siyasətinin yalnız İran daxilindəki dövlət qurumları ilə məhdudlaşmadığını göstərir. Tədbirlər Tehranla maliyyə, ticarət, nəqliyyat və digər iqtisadi əlaqələr saxlayan xarici şirkətlərə və vasitəçilərə də təsir göstərə bilər.