BAKI,VOA, Fərid Mikayılov

İran ABŞ-nin iqtisadi təzyiqlərinin ölkə əhalisinin yaşayış şəraitini daha da ağırlaşdıracağı təqdirdə Vaşinqtonun və onunla əməkdaşlıq edən ölkələrin iqtisadi maraqlarına cavab tədbirləri ilə qarşılıq veriləcəyini açıqlayıb.

VOA xəbər verir ki, İran parlamentinin sədr müavini Əli Nikzad parlamentin açıq iclasında çıxışı zamanı ABŞ-nin Tehrana qarşı iqtisadi təzyiq siyasətinə münasibət bildirib.

Nikzad ABŞ-nin təzyiqləri qarşısında geri addım atmayacaqlarını, İranın milli təhlükəsizliyini və maraqlarını bütün imkanlarla qoruyacaqlarını bəyan edib.

“Xəyalpərəst düşmənlərimiz tam iqtisadi mühasirədən danışırlar. Lakin cinayətkar Amerika bilməlidir ki, İran xalqı bu cəfəngiyyata təslim olmayacaq, eyni zamanda düşmənlərini cəzalandıracaq və onların iqtisadi maraqlarını ciddi təhlükə altına atacaq”, – deyə Nikzad bildirib.

İran parlamentinin sədr müavini ABŞ ilə əməkdaşlıq edən ölkələrə də xəbərdarlıq edib.

“İran xalqının yaşayış imkanları və iqtisadiyyatı daha da məhdudlaşdırılarsa, bu xalqın düşmənlərinin və onlarla əməkdaşlıq edən ölkələrin rifah içində yaşamasına imkan verməyəcəyik”, – deyə o vurğulayıb.

Nikzadın açıqlaması ABŞ-nin İrana qarşı iqtisadi təzyiqləri sərtləşdirmək və Tehranla iqtisadi əlaqələri davam etdirən ölkələrə qarşı əlavə tədbirlər görmək planlarının müzakirə edildiyi bir vaxta təsadüf edir.

Tehranın son bəyanatı ABŞ-nin iqtisadi təzyiq siyasətinə yalnız diplomatik deyil, qarşı tərəfin iqtisadi maraqlarını hədəfə ala biləcək tədbirlərlə cavab verməyə hazır olduğuna dair sərt siyasi xəbərdarlıq kimi qiymətləndirilir.