BAKI,VOA, Fərid Mikayılov

Suriya Müdafiə Nazirliyi İsrailin İdlib vilayətindəki Əbu Zühur hərbi hava bazasına hücumlarından sonra çoxsaylı pilotsuz uçuş aparatları vasitəsilə səmada Colan təpələrinin də daxil edildiyi Suriya xəritəsi yaradıb.

VOA xəbər verir ki, nümayiş İsrailin avqustun 18-də İdlib vilayətində hazırda fəaliyyətsiz vəziyyətdə olan Əbu Zühur hərbi hava bazasına endirdiyi hava zərbələrindən sonra keçirilib.

Çoxsaylı pilotsuz uçuş aparatlarının iştirakı ilə Əbu Zühur səmasında Suriyanın dövlət gerbi, eləcə də ölkənin xəritəsi təsvir olunub.

Diqqətçəkən məqam xəritədə hazırda İsrailin nəzarətində olan Colan təpələrinin də Suriya ərazisinin tərkib hissəsi kimi göstərilməsi olub.

Bu nümayiş Dəməşqin Colan təpələri ilə bağlı mövqeyini bir daha diqqətə çatdırması və İsrailin Suriyadakı hərbi fəaliyyətinə siyasi-rəmzi cavab kimi qiymətləndirilir.

Əbu Zühur bazasına hücum

İsrail döyüş təyyarələri avqustun 18-də Suriyanın İdlib vilayətində yerləşən və fəaliyyətsiz vəziyyətdə olduğu bildirilən Əbu Zühur hərbi hava bazasına zərbələr endirmişdi.

Suriya Xarici İşlər Nazirliyi hücumları pisləyərək İsrailin hərəkətlərini “əsassız hücum” və bölgədə təhlükəsizliklə sabitliyi təhdid edən “təhlükəli gərginləşmə” kimi qiymətləndirmişdi.

BMT-nin Suriya üzrə xüsusi nümayəndəsinin müavini Klaudio Kordone də Əbu Zühur hərbi hava bazasına hücuma münasibət bildirərək Suriyanın ərazi bütövlüyünə hörmət edilməsinə çağırmışdı.

Colan təpələrinin Suriya xəritəsinə daxil edildiyi son nümayiş İsrailin hücumlarından sonra Dəməşqin ərazi bütövlüyü məsələsində mövqeyini rəmzi şəkildə nümayiş etdirməsi kimi diqqət çəkib.