BAKI,VOA,Yusif Şərifzadə

İran parlamentinin sədri Məhəmməd Bağır Qalibaf ABŞ-nin Tehranın digər ölkələrlə iqtisadi və ticarət əlaqələrini məhdudlaşdırmaq siyasətini davam etdirə biləcək iqtisadi imkanlara malik olmadığını iddia edib.

VOA xəbər verir ki, Qalibaf bu barədə ABŞ maliyyə naziri Skott Bessentin İrana qarşı yeni sanksiyaları açıqlamasından əvvəl “X” hesabında paylaşım edib.

İran parlamentinin sədrinin sözlərinə görə, Tehranla ticarət əlaqələri saxlayan ölkələr ABŞ-nin təzyiq və xəbərdarlıqlarını nəzərə almadıqlarını artıq açıq şəkildə göstəriblər.

Qalibaf Vaşinqtonun İranın xarici iqtisadi əlaqələrini məhdudlaşdırmaq üçün tətbiq etdiyi təzyiq siyasətinin əvvəlki təsir gücünü itirdiyini iddia edib.

Onun açıqlaması ABŞ-nin İranı beynəlxalq iqtisadi və maliyyə əlaqələrindən daha geniş şəkildə təcrid etməyə yönəlmiş yeni tədbirlər hazırladığı bir vaxta təsadüf edib.

ABŞ maliyyə naziri Skott Bessent yeni sanksiyaların İranın xarici iqtisadi əlaqələrini hədəfə alacağını və Tehranla əməkdaşlığı davam etdirən tərəflərin də məhdudiyyətlərlə üzləşə biləcəyini bildirib.

Qalibaf isə İranın ticarət tərəfdaşlarının ABŞ-nin xəbərdarlıqlarına baxmayaraq Tehranla iqtisadi münasibətlərini davam etdirəcəyini iddia edir.

Beləliklə, Vaşinqton İranın xarici iqtisadi əlaqələrini məhdudlaşdırmağa çalışdığı halda, Tehran ABŞ-nin üçüncü ölkələr üzərində iqtisadi təzyiq imkanlarının zəiflədiyini irəli sürür.