BAKI,VOA, Fərid Mikayılov

Rusiya NATO ölkələrinin hərbi qüvvələrinin müharibə başa çatdıqdan sonra belə Ukrayna ərazisində yerləşdirilməsini qəbuledilməz hesab edir. Kreml Moskvanın bu mövqeyini müxtəlif səviyyələrdə dəfələrlə bəyan etdiyini bildirib.

VOA xəbər verir ki, Rusiya Prezidentinin mətbuat katibi Dmitri Peskov keçirdiyi mətbuat toplantısında “İstəklilər koalisiyası”nın Ukraynaya çoxmillətli hərbi qüvvələrin göndərilməsi ilə bağlı planlarına münasibət bildirib.

Peskov məsələnin Rusiya üçün mühüm əhəmiyyət daşıdığını vurğulayıb. Onun sözlərinə görə, NATO-ya üzv ölkələrin hərbi qüvvələrinin Ukraynada yerləşdirilməsi ideyası ilk dəfə gündəmə gətirilmir.

“Şimali Atlantika Alyansına üzv ölkələrin hərbi qüvvələrinin Ukrayna ərazisində yerləşdirilməsi niyyəti ilk dəfə səsləndirilmir. Burada bunun münaqişə başa çatdıqdan sonra həyata keçiriləcəyi qeyd olunur”, – Peskov bildirib.

Kreml sözçüsü bununla belə, döyüşlərin başa çatmasından sonra belə NATO ölkələrinə məxsus hərbi qüvvələrin Ukraynada yerləşdirilməsinin Moskvanın mövqeyini dəyişmədiyini vurğulayıb.

“Biz müxtəlif səviyyələrdə dəfələrlə mövqeyimizi bildirmişik ki, Şimali Atlantika Alyansına üzv ölkələrin xarici hərbi qüvvələrinin Ukrayna ərazisində yerləşdirilməsi bizim üçün qəbuledilməzdir”, – Peskov deyib.

Bundan əvvəl “İstəklilər koalisiyası”nın Kiyevdə keçirilən toplantısının yekunlarına dair həmsədrlərin bəyanatında Ukraynaya çoxmillətli hərbi qüvvələrin göndərilməsi planı bir daha təsdiqlənib.

Plana əsasən, bu qüvvələrin Ukraynada yerləşdirilməsi yalnız etibarlı atəşkəs təmin edildikdən sonra nəzərdə tutulur.

Ukraynaya göndərilməsi planlaşdırılan çoxmillətli hərbi qüvvələrin dəqiq sayı isə hələlik açıqlanmayıb.

Moskvanın son açıqlaması göstərir ki, mümkün atəşkəs və ya müharibədən sonrakı təhlükəsizlik mexanizmləri çərçivəsində NATO ölkələrinin hərbi qüvvələrinin Ukraynada yerləşdirilməsi Rusiya ilə Qərb arasında əsas fikir ayrılıqlarından biri olaraq qalır.