BAKI,VOA, Nailə Babazadə

BMT-nin Baş katibi Antonio Quterreş Hörmüz boğazındakı gəmi hərəkətinin məhdudlaşdırılmasının qlobal qida böhranını tətikləyə biləcəyi barədə xəbərdarlıq edərək, dünya iqtisadiyyatının "nəfəs alması" üçün boğazın dərhal açılmasına çağırıb.

VOA xəbər verir ki, BMT Təhlükəsizlik Şurasındakı çıxışı zamanı o bildirib ki, dəniz yollarının təhlükəsizliyi hazırda beynəlxalq nizam üçün ciddi bir sınağa çevrilib.

Quterreş mart ayının əvvəlindən bəri Hörmüz boğazındakı fasilələrin qlobal enerji təhlükəsizliyinə, qida təchizatına və ticarətə mənfi təsir göstərdiyini vurğulayıb. Onun sözlərinə görə, bu vəziyyət COVID-19 pandemiyası və Ukrayna müharibəsindən sonra yaşanan ən ağır təchizat zənciri krizidir. Baş katib xüsusilə Afrika və Cənubi Asiyada milyonlarla insanın bu aksamalar səbəbindən aclıq və yoxsulluğa sürüklənmə riski altında olduğunu qeyd edib.

Seyrüsefer azadlığının pozulması nəticəsində 20 mindən çox dənizçinin və 2 mindən çox gəminin dənizdə mahsur qaldığını deyən Quterreş, tərəfləri heç bir keçid haqqı və ya ayrı-seçkilik qoymadan gəmilərin sərbəst hərəkətinə şərait yaratmağa səsləyib. O, "Qara dəniz Taxıl Təşəbbüsü"nü nümunə çəkərək xatırladıb ki, hətta ən kəskin münaqişələrin ortasında belə praktiki əməkdaşlıq ticarət koridorlarını yenidən aça və qlobal bazarların sabitliyini təmin edə bilər.