BAKI,VOA,Yusif Şərifzadə

Ağ Ev ABŞ ilə İran arasında hazırda hər hansı danışığın aparılmadığını və yaxın dövr üçün belə bir görüşün planlaşdırılmadığını açıqlayıb. Ağ Evin mətbuat katibinin müavini Anna Kelli Vaşinqtonun Tehranla danışıqlarda iştirak etmədiyini bildirib.

VOA xəbər verir ki, Anna Kelli ABŞ ilə İran arasında “heç bir danışıq və ya müzakirənin aparılmadığını, həmçinin belə danışıqların planlaşdırılmadığını” vurğulayıb. Onun açıqlaması bölgədə gərginliyin diplomatik yollarla azaldılması istiqamətində səylərin davam etdiyi bir vaxta təsadüf edir.

Ağ Ev rəsmisi eyni zamanda ABŞ-nin Hörmüz boğazındakı vəziyyətlə bağlı əvvəlki mövqeyini təkrarlayıb. Vaşinqton strateji su yolunun açıq olduğunu bildirir.

Kelli Hörmüz boğazının minalardan tamamilə təmizləndiyini də iddia edib. ABŞ rəhbərliyi bundan əvvəl boğazda gəmi hərəkətinin davam etdiyini və təhlükəsizliyin təmin olunması istiqamətində tədbirlər görüldüyünü bildirmişdi.

Ağ Evin açıqlaması Qətər və digər bölgə dövlətlərinin İranla təmasları və gərginliyin azaldılması istiqamətində diplomatik səyləri fonunda verilib.

Vaşinqton isə hazırda Tehranla birbaşa danışıqların aparılmadığını açıq şəkildə bildirir. Ağ Evin açıqlamasına əsasən, tərəflər arasında yeni görüş və ya müzakirə üçün müəyyən edilmiş vaxt da yoxdur.

Beləliklə, bölgə ölkələrinin diplomatik təşəbbüslərinə baxmayaraq, ABŞ ilə İran arasında birbaşa danışıqların nə vaxt bərpa oluna biləcəyi hələlik məlum deyil.