BAKI, VOA, Nailə Babazadə

ABŞ Milli İqtisadi Şurasının direktoru Kevin Hassett "CBS News" telekanalına verdiyi müsahibədə Donald Tramp administrasiyasının İrana qarşı başlatdığı hərbi əməliyyatların maliyyə yükünü açıqlayıb.

VOA xəbər verir ki, Hassettin sözlərinə görə, hücumların başladığı gündən bəri ABŞ-ın hərbi xərcləri 12 milyard dolları ötüb. O, ABŞ-ın hazırkı silah ehtiyatlarının kifayət qədər olduğunu və bu mərhələdə Konqresdən əlavə büdcə tələb etməyi planlaşdırmadıqlarını bildirib.

İqtisadi direktoru Tehranın hərəkətlərinin Amerika iqtisadiyyatına ciddi zərər vura bilməyəcəyini vurğulayaraq, ABŞ-ın 1970-ci illərdən fərqli olaraq hazırda nəhəng neft istehsalçısına çevrildiyini xatırladıb. Lakin bəzi ekspertlər və iddialara görə, hərbi xərclər rəsmi rəqəmlərdən daha yüksək ola bilər. Belə ki, əməliyyatların yalnız ilk 6 günündə maliyyə maliyyətinin 11,3 milyard dolları keçdiyi barədə məlumatlar yayılmışdı.

Xatırladaq ki, fevralın 28-də ABŞ və İsrailin İrana qarşı başlatdığı əməliyyatlar nəticəsində İranın ali lideri Ayətullah Əli Xameneyi də daxil olmaqla bir çox rəsmi həlak olub. İran isə bu hücumlara regiondakı ABŞ bazalarına (Qətər, BƏƏ, Bəhreyn) zərbələr endirməklə cavab verib. Son məlumatlara görə, münaqişə zonasında ölənlərin sayı 1348-i, yaralıların sayı isə 17 mini keçib. Kevin Hassett hərbi xərclərin artmasına baxmayaraq, ABŞ-ın enerji müstəqilliyi sayəsində iqtisadi dayanıqlılığını qoruyacağını bəyan edib.