BAKI,VOA, Fərid Mikayılov

ABŞ Prezidenti Donald Tramp ölkənin enerji sisteminin təhlükəsizliyinin qorunması məqsədilə fövqəladə vəziyyət elan edib. Bununla bağlı müvafiq fərman Ağ Evin rəsmi saytında dərc olunub.

VOA xəbər verir ki, sənəddə xarici ölkələrdən ABŞ-nin enerji sistemi üçün elektrik avadanlıqlarının tədarükünün ölkənin milli təhlükəsizliyi və iqtisadiyyatı üçün təhdid yaratdığı bildirilir.

Fərmanda qeyd olunur ki, təhlükə həm ayrı-ayrı əməliyyatlar, həm də müəyyən kateqoriyaya daxil olan sövdələşmələr çərçivəsində yarana bilər. Buna görə ABŞ-də istifadə olunan enerji sistemi avadanlıqlarının təhlükəsizliyini, bütövlüyünü və etibarlılığını qorumaq üçün əlavə tədbirlərin görülməsinin zəruri olduğu vurğulanır.

Yeni qərar müəyyən xarici istehsal elektrik avadanlıqlarının ABŞ-də alınmasını, ölkəyə gətirilməsini, ötürülməsini və quraşdırılmasını məhdudlaşdırır.

Məhdudiyyət xarici dövlətin və ya xarici vətəndaşın həmin avadanlıqla bağlı birbaşa və ya dolayı marağının olduğu hallara, o cümlədən avadanlığın tədarük müqaviləsində iştirak etdiyi vəziyyətlərə şamil edilir.

Beləliklə, Vaşinqton enerji infrastrukturu üçün istifadə edilən xarici mənşəli avadanlıqlardan yarana biləcək təhlükələri milli təhlükəsizlik məsələsi kimi qiymətləndirərək bu sahədə nəzarəti gücləndirməyə qərar verib.

Bundan əvvəl Tramp ABŞ vətəndaşlığının əldə edilməsi məqsədilə ölkəyə uşaq dünyaya gətirmək üçün səfərlərin qarşısının alınmasını nəzərdə tutan fərman da imzalayıb.