BAKI,VOA,Yusif Şərifzadə

İran parlamentinin sədri və ölkənin əsas danışıqlarçısı Məhəmməd Baqir Qalibaf Qətərin Baş naziri Məhəmməd bin Əbdürrəhman bin Casim Al Tani ilə görüşündə ABŞ-nin İrana qarşı siyasətini sərt tənqid edib.

VOA xəbər verir ki, Qalibaf Tramp administrasiyasının yanlış məlumatlara əsaslanaraq səhv qərarlar qəbul etdiyini bildirib. Onun sözlərinə görə, bu siyasət ABŞ-nin imkanlarının səmərəsiz istifadəsinə və bölgədə sabitliyin pozulmasına gətirib çıxarır.

Qalibaf ABŞ-nin İrana qarşı tətbiq etdiyi iqtisadi mühasirənin nəticə verməyəcəyini və uğursuzluğa düçar olacağını bildirib. O, Tehranın xarici iqtisadi təzyiqlərə müqavimət göstərəcəyini vurğulayıb.

İran parlamentinin sədri Vaşinqtonu qarşılıqlı anlaşma sənədi çərçivəsində üzərinə götürdüyü öhdəlikləri yerinə yetirməyə çağırıb. Qalibafın sözlərinə görə, ABŞ razılaşdırılmış öhdəliklərə əməl etməlidir.

Açıqlama Qətərin Baş nazirinin Tehranda İranın yüksək vəzifəli rəsmiləri ilə apardığı danışıqlar zamanı səsləndirilib. Qətər tərəfi bölgədə gərginliyin azaldılması və dialoqun bərpası istiqamətində diplomatik səylər göstərir.