BAKI, VOA, Nailə Babazadə

ABŞ-ın Müdafiə naziri Pit Heqset, Kolorado ştatına səfəri zamanı jurnalistlərin suallarını cavablandırarkən İranla davam edən nüvə müzakirələrinə toxunub.

VOA xəbər verir ki, Heqset vurğulayıb ki, Tehran rəhbərliyi gecikmədən bir razılaşmaya imza atmalıdır. O, Prezident Donald Trampın diplomatik həlli üstün tutduğunu, lakin danışıqlar uğursuz olarsa, masada hərbi müdaxilə də daxil olmaqla bütün seçimlərin olduğunu bildirib.

Hərbi zərbə ehtimalı ilə bağlı suala Heqset, "Hər şey masadadır. Bu, Prezidentin qərarıdır" cavabını verib. Nazir əlavə edib ki, ABŞ tərəfi hazırda bir razılaşmanın əldə olunması üçün səylərini davam etdirir, lakin Tehranın "müdrikcə" davranıb təqdim olunan şərtləri qəbul etməsi vacibdir. Qeyd edək ki, Prezident Tramp da bundan əvvəl verdiyi açıqlamada, razılaşma əldə olunmazsa, nəticənin İran üçün "pis olacağı" barədə xəbərdarlıq etmişdi.

ABŞ və İran arasındakı gərginlik fonunda diplomatiya kanalları da işləməkdədir. 2025-ci ilin iyununda baş verən hərbi toqquşmalardan sonra kəsilən danışıqlar cari ilin 6 fevralında Omanda, daha sonra isə 18 fevralda Cenevrədə bərpa olunub. Tərəflərin növbəti — üçüncü tur görüşünün 26 fevralda yenidən İsveçrənin Cenevrə şəhərində keçirilməsi planlaşdırılır. Bu görüşün tərəflər arasında gərginliyi azaldacaq konkret bir çərçivə sazişinə yol açıb-açmayacağı dünya birliyi tərəfindən diqqətlə izlənilir.