Bakı, AzerVoice, Nailə Babazadə

İran Xarici İşlər Nazirliyinin sözçüsü İsmail Bəqayi İraqın Tehran və Vaşinqton arasında dialoqu təşviq etmək səylərini müsbət qiymətləndirdiklərini bildirib.

AzerVoice xəbər verir ki, o qeyd edib ki, istənilən danışıqlar prosesi effektiv və real nəticələr verməsi üçün müəyyən edilmiş diplomatik prosedurlara uyğun aparılmalıdır. Bəqayi Tehranda keçirilən həftəlik mətbuat konfransında diplomatiyanın İranın milli maraqlarının qorunmasında əsas vasitələrdən biri olduğunu və faydalı olduğu hallarda bu alətdən istifadə olunacağını vurğulayıb.

İraqın baş nazirinin Bağdadın İran–ABŞ arasında birbaşa danışıqlara ev sahibliyi etməsi ilə bağlı açıqlamasına toxunan XİN sözçüsü İraqın regional sabitlik və təhlükəsizliklə bağlı narahatlığını təqdirəlayiq hesab edib. O bildirib ki, İran qonşu ölkələrin gərginliyin azaldılmasına yönəlmiş səmimi təşəbbüslərini dəstəkləyir, lakin real dialoq yalnız diplomatik mexanizmlərə sadiqlik olduğu halda mümkün ola bilər.

Bəqayi açıqlayıb ki, hazırda İran və ABŞ arasında rəsmi əlaqə kanalları İsveçrədə və Vaşinqtonda fəaliyyət göstərən maraq bölmələri vasitəsilə aktivdir və yeni əlaqə mexanizmlərinə ehtiyac yoxdur. Onun sözlərinə görə, mövcud danışıqlar yalnız nüvə məsələləri ilə məhdudlaşır və əlavə şərtlər, eləcə də mövzu ilə əlaqəsi olmayan məsələlər gündəmə gətirilməyəcək.