BAKI, AzerVoice, Nailə Babazadə
Beynəlxalq Xilasetmə Komitəsinin (IRC) yaydığı qlobal humanitar böhranlar üzrə izləmə siyahısına görə, Sudanda davam edən münaqişə on minlərlə insanın həyatına son qoyduğu bir vaxtda ölkə yenidən siyahının ilk sırasında yer alıb.
AzerVoice xəbər verir ki, Sudan bu siyahıya ardıcıl üçüncü dəfə başçılıq edir. Siyahı çərşənbə axşamı dərc olunub və yeni və ya daha da pisləşə biləcək humanitar fövqəladə vəziyyət riski altında olan 20 ölkəni əhatə edir.
IRC-nin baş icraçı direktoru Devid Miliband açıqlamasında bildirib.
“IRC-nin sahədə müşahidə etdikləri faciəvi bir təsadüf deyil. Dünya sadəcə böhranlara cavab verməkdə aciz qalmır; görülən addımlar və deyilən sözlər bu böhranları yaradır, uzadır və hətta mükafatlandırır.” - deyə qeyd edib.
“O cümlədən bu il ardıcıl üçüncü dəfə İzləmə Siyahısında birinci yerdə qərarlaşan Sudan böhranının miqyası və artıq tarixdə qeydə alınmış ən böyük humanitar böhrana çevrilməsi bu nizamsızlığın açıq göstəricisidir.” - deyə Devid vurğulayıb.
Sudanda müharibə 2023-cü ilin aprelində mülki idarəçiliyə keçid planları ərəfəsində Sudan ordusu ilə yarımhərbi Sürət Dəstək Qüvvələri arasında hakimiyyət uğrunda mübarizə nəticəsində başlayıb və dünyanın ən böyük köçkünlük böhranına səbəb olub. Davam edən müharibə nəticəsində artıq 12 milyondan çox insan yerindən didərgin düşüb. Humanitar yardım işçiləri qaçan insanlara kömək etmək üçün kifayət qədər resurslara malik deyil; bu insanlar arasında zorakılığa məruz qalan, talan edilən və yaxınlarını itirənlər çoxdur.
Siyahıya əsasən, Sudandan sonra Fələstin əraziləri, Cənubi Sudan, Efiopiya və Haiti gəlir.
IRC bildirib ki, bu ölkələr dünya əhalisinin cəmi 12 faizinə ev sahibliyi etsələr də, humanitar yardıma ehtiyacı olan insanların 89 faizi məhz bu ölkələrin payına düşür. Eyni zamanda, 2029-cu ilə qədər dünyadakı ifrat yoxsulların yarıdan çoxunun bu ölkələrdə yaşayacağı proqnozlaşdırılır.
Siyahıda yer alan digər ölkələr isə Myanma, Konqo Demokratik Respublikası, Mali, Burkina-Faso, Livan, Əfqanıstan, Kamerun, Çad, Kolumbiya, Niger, Nigeriya, Somali, Suriya, Ukrayna və Yəməndir.