BAKI, AzerVoice, Səməd Əyyubov
ABŞ, Birləşmiş Millətlər Təşkilatının (BMT) Baş Assambleyasına qatılmaq istəyən Fələstin rəhbərliyi üzvlərinə viza verməyəcək.
AzerVoice xəbər verir ki, məsələ ilə bağlı ABŞ Dövlət Departamenti açıqlama yayıb.
“Dövlət katibi Marko Rubionun qərarına əsasən, BMT Baş Assambleyası öncəsi Fələstin Azadlıq Təşkilatı və Fələstin Administrasiyası üzvlərinə viza verilməyəcək, artıq verilmiş vizalar isə ləğv olunacaq” - deyə, açıqlamada vurğulanıb.
Bu addım Fransanın Fələstin dövlətinin tanınması istiqamətində atdığı təşəbbüslərə cavab olaraq qiymətləndirilir.
Xatırladaq ki, Fransa prezidenti Emmanuel Makron iyulun 24-də Fələstinin tanımaq qərarını elan edib və sentyabr ayında BMT Baş Assambleyasında bu barədə rəsmi açıqlama verəcək. İsrail bu qərarı “antisemitizmi alovlandırmaq” kimi dəyərləndirsə də, Fransa iddiaları rədd edərək Fələstinə dəstəyini davam etdirir.