BAKI, AzerVoice, Səməd Əyyubov

ABŞ prezidenti Donald Tramp Rusiya prezidenti Vladimir Putin və Ukrayna prezidenti Volodimir Zelenskinin mümkün görüşündə iştirak etməyi zəruri hesab etmədiyini bildirib.

AzerVoice xəbər verir ki, bu barədə o, jurnalistlərin suallarını cavablandırarkən deyib.

“Görək, Putin və Zelenski birlikdə işləyə biləcəklərmi. Görək, mənim orada olmağım lazım olacaqmı. Mən istərdim ki, onlar görüşsünlər və nəticə əldə edib-etməyəcəklərinə baxaq” – deyə, Tramp qeyd edib.

Tramp Rusiya və Ukrayna arasındakı münasibətləri “yağ və sirkə” ilə müqayisə edib və “aydın səbəblərə görə onların münasibətlərinin yaxşı olmadığını” vurğulayıb.

Bundan əvvəl Rusiya xarici işlər naziri Sergey Lavrov “NBC News” telekanalına açıqlamasında bildirmişdi ki, hazırda Putinlə Zelenskinin görüşü gündəmdə deyil. Lakin gündəliyə uyğun mövzular daxil olduqda Rusiya prezidentinin belə görüşə hazır olacağını qeyd etmişdi.

Xatırladaq ki, avqustun 18-də Ağ Evdə ABŞ prezidenti Donald Tramp, Ukrayna prezidenti Volodimir Zelenski və bir sıra Avropa liderlərinin iştirakı ilə danışıqlar aparılıb.

Avqustun 19-da Ukrayna ilə bağlı iki mühüm görüş keçirilib – “istəklilər koalisiyası”nın liderlərinin videokonfransı və Avropa İttifaqının onlayn sammiti.

Hər iki tədbirdə Alyaskada baş tutan ABŞ–Rusiya sammitinin nəticələri, ABŞ prezidenti Donald Trampın Ukrayna prezidenti Volodimir Zelenski və bir sıra Avropa liderləri ilə apardığı danışıqlar, həmçinin döyüş əməliyyatları başa çatdıqdan sonra Ukraynaya veriləcək təhlükəsizlik təminatları müzakirə olunub.