BAKI, AzerVoice
ABŞ ilə Avropa İttifaqı arasında ticarət razılaşması əldə olunub.
AzerVoice xəbər verir ki, bu barədə ABŞ Prezidenti Donald Tramp, Avropa Komissiyasının sədri Ursula fon der Lyayen ilə Şotlandiyada keçirdiyi görüşdən sonra deyib.
Trampın sözlərinə görə, Aİ ABŞ-dan 750 milyard dollar dəyərində enerji resursları alacaq və ABŞ iqtisadiyyatına əlavə 600 milyard dollar investisiya yatıracaq. Həmçinin, Brüssel böyük miqdarda hərbi texnika alacağını da öhdəsinə götürüb.
Bu razılaşma Avropa İttifaqına, Trampın avqustun 1-dən etibarən tətbiq etməyi planlaşdırdığı 30 faizlik gömrük rüsumlarından yayınmağa imkan verəcək. Saziş çərçivəsində ABŞ Aİ-dən idxal olunan malların böyük əksəriyyətinə, o cümlədən avtomobillərə 15 faizlik rüsum tətbiq edəcək. Bunun müqabilində isə Brüssel Amerika məhsullarının idxalı üçün bazarını rüsumdan azad (sıfır tariflə) açacaq.
Tramp bu razılaşmanı “indiyə qədərki ən böyük saziş” adlandırıb. Fon der Lyayen isə bunun sabitlik gətirəcəyini deyib. ABŞ Ticarət naziri Hovard Lutnik isə bildirib ki, Aİ-dən idxal olunan yarımkeçiricilər və dərman preparatlarına tətbiq ediləcək tariflərlə bağlı qərar təxminən “iki həftə ərzində” veriləcək.
Xatırladaq ki, iyulun 12-də Tramp avqustun 1-dən etibarən Avropa İttifaqından idxal olunan mallara 30 faizlik rüsum tətbiq ediləcəyini açıqlamışdı. O, Avropa ölkələrinin buna cavab olaraq eyni ölçüdə addım atacağı təqdirdə, ABŞ-ın tariflərinə “bu rəqəmi” əlavə edəcəyini demişdi.