BAKI, AzerVoice

HƏMAS ABŞ-ın atəşkəs danışıqlarından çıxmasına dair qərarından və ABŞ rəsmilərinin danışıqların dayanmasına görə HƏMAS-ı günahlandıran bəyanatlarından təəccüblənib.

AzerVoice xəbər verir ki, bu barədə HƏMAS-ın siyasi bürosunun üzvü İzzət əl-Rişək bildirib.

“ABŞ Prezidenti Donald Trampın, eləcə də daha əvvəl ABŞ-ın Yaxın Şərq üzrə xüsusi nümayəndəsi Stiven Uitkoffun verdiyi açıqlamalar bizi təəccübləndirdi. Bu açıqlamalar vasitəçi ölkələrin HƏMAS-ın mövqeyinə dair verdiyi qiymətləndirmə ilə üst-üstə düşmür və danışıqlarda əldə edilən real irəliləyişləri əks etdirmir” – deyə, əl-Rişək qeyd edib.

Onun sözlərinə görə, danışıqlarda vasitəçi olan Misir və Qətər HƏMAS-ın ciddi və konstruktiv yanaşmasına görə minnətdarlıqlarını ifadə ediblər.

Xatırladaq ki, iyulun 6-da Dohada atəşkəsin əldə olunması və Qəzzada saxlanılan israilli girovların azad olunması məqsədilə danışıqlar yenidən başlayıb.

HƏMAS atəşkəs danışıqlarının davam etdirilməsi məqsədilə vasitəçilərə son təklifə cavab verdiyini bildirib, lakin bu cavab barədə ətraflı məlumat verilməyib.

İsrail Baş naziri Benyamin Netanyahunun ofisi bildirib ki, HƏMAS-ın cavabını aldıqdan sonra İsrail Dohadakı heyətini məsləhətləşmələr üçün geri çağırıb.

Daha sonra, Stiven Uitkoff bildirib ki, ABŞ Qəzza zolağında atəşkəs danışıqlarını dayandıraraq Qətərdəki danışıqlar üzrə qrupunu məsləhətləşmələr üçün geri çağırıb. O həmçinin bildirib ki, bu qərar HƏMAS-ın Qəzzada atəşkəsə nail olmaq istəmədiyini açıq şəkildə göstərən son cavabından sonra verilib.