BAKI, AzerVoice

Qahirədə keçirilən və “gərgin” adlandırılan görüşdən sonra bəzi fələstinli fraksiyalarla HƏMAS arasında mövqelərdə açıq fərqlərin ortaya çıxdığı görülsə də, hərəkatın mövqeyi dəyişərək İsrailin Qəzza şəhərini işğal etməsinin və təxminən 1 milyon fələstinlinin yenidən cənuba köçürülməsinin qarşısını almağa yönəlmiş razılaşmaya daha açıq münasibət nümayiş etdirdi.

Mənbələrin açıqlamasına görə, Xəlil əl-Həyyə başçılıq etdiyi HƏMAS nümayəndə heyəti Misir və Qətər vasitəçilərinə 60 günlük atəşkəs təklifinin son versiyasını qəbul etməyə hazır olduğunu çatdırıb. Bu plana əsasən, İsrail qüvvələrinin müəyyən mövqelərə çəkilməsi, 10 israilli əsirin azad edilməsi və bundan sonra yekun mərhələyə dair danışıqların başlaması nəzərdə tutulur.

Mənbələr bildirir ki, HƏMAS bu qərarla İsrail qarşısında topu buraxıb: hərəkat əvvəllər etdiyi dəyişikliklərdən – qoşunların çıxarılması və bəzi fələstinli məhbusların azadlığına dair əlavə tələblərdən imtina etdiyini vasitəçilərə rəsmən açıqlayıb.

Bu mövqenin, digər fələstinli fraksiyaların təzyiqi ilə deyil, İsrailin Qəzzanı işğal planını dayandırmaq zərurəti ilə bağlı qəbul edildiyi bildirilir. Əks halda, şəhər və şimal tam boşaldıla, hətta burada yeni israilli yaşayış məntəqələri salına bilər.

Mənbələrin sözlərinə görə, Türkiyə, Qətər və Misir ABŞ-a HƏMAS-ın yeni mövqeyi barədə məlumat verib. Hazırda ikinci mərhələyə – müharibəni tam dayandıracaq daha geniş razılaşmaya aparacaq yeni diplomatik təzyiqlər müzakirə olunur.

İsrailin reaksiyası isə bəlli deyil. ABŞ-la birlikdə yeni plan üzərində işləyən Təl-Əviv, əslində, bütün girovların azadlığı, HƏMAS və digər qrupların silahsızlaşdırılması və təşkilatın siyasi səhnədən kənarlaşdırılmasına yönəlmiş yekun saziş istəyir.

İsrail mediasının məlumatına görə, Baş nazir Benyamin Netanyahunun qarşısına HƏMAS-ın “qismən razılaşmaya hazır olduğu”na dair rəsmi sənəd qoyulub. Təhlükəsizlik qurumlarının rəhbərləri bu fürsətdən istifadə etməyin vacibliyini vurğulayır. Amma strateji işlər naziri və əsas danışıqlar nümayəndəsi Ron Dermer bu plana qarşı çıxır və hətta istefa verə biləcəyi deyilir.

İsraildə yekun qərarı “təhlükəsizlik kabineti”nin (kabinət) verəcəyi gözlənilir.

Döyüş meydanındakı vəziyyət

İsrail ordusu həm quru, həm hava əməliyyatlarını davam etdirir. Quru qoşunları Qəzzanın cənubunda yerləşən əz-Zeytun və əs-Sabra məhəllələrində irəliləyib, burada evlər və binalar dağıdılıb. Eyni zamanda, Xan Yunusun müxtəlif hissələrində də bombardmanlar davam edir.

Şənbə səhərindən günortaya qədər həyata keçirilən hücumlarda azı 20 fələstinli öldürülüb. Onlardan bəziləri köçkünlərin yerləşdiyi çadırlarda, bəziləri isə yardım gözləyən qruplar arasında hədəfə alınıb.

Humanitar vəziyyət isə getdikcə pisləşir. Yardımların qarət olunması və təhlükəsiz şəkildə ehtiyacı olanlara çatdırılmaması böhranı daha da dərinləşdirib. Qəzza Səhiyyə Nazirliyi son 24 saatda aclıq və qida çatışmazlığı səbəbindən 11 nəfərin, o cümlədən bir uşağın öldüyünü açıqlayıb. Ümumilikdə indiyədək aclıqdan ölənlərin sayı 251 nəfərə çatıb ki, onların 108-i uşaqlardır.