BAKI, AzerVoice, Orxan Qədirzadə

İran ABŞ-lə nüvə danışıqları aparmayacaq.

AzerVoice xəbər verir ki, bu sözləri İran Xarici İşlər Naziri Abbas Əraqçi İranın nüvə proqramına dair verdiyi açıqlamada bildirib.

Əraqçi deyib ki, İran nüvə fəaliyyətlərindən vaz keçməyəcək və raket proqramı müzakirə mövzusu olmayacaq.

“Heç bir ağıllı insan silahsızlanmanı qəbul etməz. Uranı zənginləşdirməyi dayandırmaq mümkün deyil. Müharibə ilə əldə edilməyən şey siyasətlə verilməz. Tehran nüvə fəaliyyətlərinin dinc xarakterli olduğundan əmindir və narahatlıqları aradan qaldırmaq üçün danışıqlara hazırdır. Lakin birbaşa görüş niyyətində deyilik. Ədalətli razılaşmağa gəlmək mümkündür, lakin Vaşinqton qəbulolunmaz şərtlər irəli sürüb. ABŞ öz tələb və şərtlərini yerinə yetirməyimiz üçün təkid etməsə, dolayı görüşlər vasitəsilə ədalətli razılığa gələ bilərik”-deyə nazir bildirib.

Əraqçi ötən aylarda İsrail ilə yaşanan 12 günlük münaqişəyə də toxunaraq hər bir situasiyaya hazır olduqlarını bildirib. Nazir vurğulayıb ki, İran yüksək hazırlıq vəziyyətindədir və yeni bir hərbi toqquşma halında İsrail ağır zərbələr alacaq.

“Sionist rejimdən hər cür düşməncə hərəkət gözləyirik. Bütün səviyyələrdə ən yüksək hazırlıqdayıq və gələcəkdə hər hansı bir müharibədə İsrail bir daha məğlub olacaq. Bu döyüşdə əhəmiyyətli təcrübələr qazandıq və raketlərimizi real şəraitdə sınadıq. Əgər sionist rejim yenidən hücuma keçsə, nəticələri onlar üçün ağır olacaq.”- deyə nazir əlavə edib.

Əraqçi həmçinin bəyan edib ki, İsrail ABŞ-nin yaşıl işığı olmadan İranı hədəfə ala bilməz. Nazir həmçinin İsrailin baş naziri Benyamin Netanyahunu savaş cinayəti törətməkdə ittiham edib.

Nazir ABŞ və İsrailin zərbə endirdiyi bəzi nüvə obyektlərindəki vəziyyətə də toxunub.

“Nüvə materialları hələ vurulan obyektlərin dağıntıları altındadır. Binalar və bəzi avadanlıqlar zərər görüb, lakin nüvə texnologiyası möhkəm qalıb.”- deyə o, bildirib.