BAKI,VOA,Yusif Şərifzadə

İsrailin Baş naziri Benyamin Netanyahu bildirib ki, ölkəsinin əsas məqsədi İranın nüvə silahı əldə etməsinin qarşısını almaqdır və bu istiqamətdə mübarizə davam etdiriləcək.

VOA xəbər verir ki, Netanyahu jurnalistlər üçün keçirdiyi canlı mətbuat konfransında İsrailin qarşısında duran əsas təhlükələrdən birinin İranın nüvə proqramı olduğunu vurğulayıb.

Baş nazir qeyd edib ki, hökumət fəaliyyətinin əsas hədəflərindən biri İsrail üçün mövcud hesab edilən nüvə təhlükəsini aradan qaldırmaqdır.

Onun sözlərinə görə, bu məqsəd müəyyənləşdirilib və İsrail həmin istiqamətdə fəaliyyətini davam etdirəcək.

Netanyahu bəyan edib ki, İranın nüvə silahına sahib olmasına imkan verilməyəcək.

O vurğulayıb ki, İsrail bu məqsədə nail olmaq üçün zəruri hesab etdiyi bütün addımları atmağa hazırdır.

Baş nazirin açıqlaması İran və ABŞ arasında əldə olunan razılaşma ətrafında müzakirələrin davam etdiyi bir vaxtda səslənib.

Netanyahunun bəyanatı Tel-Əviv rəhbərliyinin İranın nüvə proqramına dair mövqeyində hər hansı dəyişiklik olmadığını göstərir.