BAKI,VOA, Fərid Mikayılov

İran parlamentinin sədri və danışıqlar heyətinin rəhbəri Məhəmməd Baqir Qalibaf ABŞ ilə davam edən danışıqlarla bağlı ölkəsinin mövqeyini açıqlayıb.

VOA xəbər verir ki, Qalibaf parlamentin onlayn iclasında çıxışı zamanı bildirib ki, İran xalqının hüquqları tam təmin olunmadan heç bir razılaşma təsdiqlənməyəcək.

Onun sözlərinə görə, diplomatiyanın əsas məqsədi qarşıdurma meydanında əldə olunan nəticələri siyasi müstəvidə möhkəmləndirməkdir.

“Diplomatik cəbhədə fəaliyyət göstərən nümayəndələrimiz qarşı tərəfin vədlərinə etibar etmir. Bizim üçün əsas meyar konkret nəticələrin əldə olunmasıdır. Öhdəliklərimizi yalnız qarşılığında real nailiyyətlər əldə etdiyimiz halda yerinə yetirəcəyik. İran xalqının hüquqları təmin olunana qədər heç bir sazişi təsdiqləməyəcəyik”, – deyə Qalibaf vurğulayıb.

İran parlamentinin sədri həmçinin bəyan edib ki, ölkəyə qarşı təzyiqlər artıq yeni mərhələyə keçib. Onun fikrincə, xarici qüvvələr iqtisadi təzyqlər və informasiya kampaniyaları vasitəsilə milli birliyi zəiflətməyə çalışırlar.

Qalibaf qeyd edib ki, İran bu təzyiqlərə baxmayaraq mübarizəsini hərbi, diplomatik və sosial sahələrdə davam etdirəcək.