BAKI,VOA, Fərid Mikayılov

İran parlamenti sədrinin müavini Əli Nikzad ABŞ ilə aparılan danışıqlarda İranın təqdim etdiyi 10 maddəlik təklifin qəbul edilməyəcəyi halda razılaşmanın baş tutmayacağını bildirib.

VOA xəbər verir ki, Nikzad qeyd edib ki, bu şərtlər qəbul olunmazsa, Əli Xamenei razılaşmanın imzalanmasına icazə verməyəcək.

Bildirilib ki, İranın irəli sürdüyü əsas tələblər arasında hərbi əməliyyatların tam dayandırılması, ABŞ qüvvələrinin regiondan çıxarılması, Hörmüz boğazı üzərindən keçid məsələlərinin tənzimlənməsi, sanksiyaların ləğvi və ölkəyə dəyən zərərin kompensasiyası yer alır.

Qeyd olunub ki, İran nüvə silahı istehsal etməmək öhdəliyini qəbul etsə də, qarşı tərəfdən konkret təminatlar gözləyir.

Eyni zamanda bildirilib ki, Tehran tərəfi Hörmüz boğazından keçən neft daşımalarına görə əlavə ödəniş tətbiq etməyi planlaşdırır.

Məlumata görə, ABŞ Prezidenti Donald Trump 8 aprel tarixində İranla iki həftəlik atəşkəsi qəbul etdiklərini açıqlayıb və İranın təqdim etdiyi təkliflərin danışıqlar üçün əsas ola biləcəyini bildirib.

Qeyd edilir ki, yekun razılaşmanın Pakistanın vasitəçiliyi ilə yaxın günlərdə İslamabadda müzakirə olunması planlaşdırılır.