BAKI,AzerVoice Analitik Təhlil Mərkəzi

ABŞ prezidenti Donald Tramp çərşənbə günü bir daha HƏMAS-a müraciət edərək, bütün israilli girovların dərhal azad edilməsini tələb edib. O, “Truth Social” platformasında paylaşdığı mesajında bildirib:

“Onlara (HƏMAS-a) deyin ki, bütün 20 girovu dərhal (iki, beş və ya yeddi yox!) azad etsinlər. Hər şey sürətlə dəyişəcək. Müharibə bitəcək!”.

Trampın bu açıqlamasına cavab olaraq, HƏMAS bəyan edib ki, hərtərəfli bir razılaşmaya getməyə hazırdır və bütün əsirlərin azad edilməsi müqabilində müharibənin dayandırılmasını dəstəkləyir. Hərəkat həmçinin müstəqil texnokratlardan ibarət milli idarəetmənin yaradılmasına razı olduğunu, lakin İsrailin vasitəçilərin təqdim etdiyi təklifə cavab vermədiyini vurğulayıb.

İsrail Baş naziri Benyamin Netanyahu isə HƏMAS-ın bəyanatını “hiylə” adlandıraraq rədd edib. İsrail mediasına açıqlamasında o, “Müharibəni yalnız bizim şərtlərimizlə bitirmək mümkündür. Bunlara HƏMAS-ın silahsızlandırılması və Qəzza üzərində təhlükəsizlik nəzarətinin qurulması daxildir”, – deyə bildirib.

Qəzzada vəziyyət

İsrail ordusunun Baş Qərargah rəisi Eyal Zamir çərşənbə günü Qəzza şəhərində planlaşdırılan hərbi əməliyyatlarla bağlı açıqlama verib. O, pilotsuz uçuş aparatlarından istifadə edilməklə binaların üst qatlarının genişmiqyaslı dağıdılması planını təqdim edib və əsas məqsədin sakinlərin cənuba doğru köçürülməsi olduğunu söyləyib.

Son saatlarda İsrail ordusu xüsusilə Qəzza şəhərinin şimalındakı Şeyx Rizvan məhəlləsində ağır bombardman həyata keçirib. Müdafiə xidməti 45 nəfərin həlak olduğunu açıqlayıb. İsrail tərəfi isə bu əməliyyatların şəhərin tam nəzarətə götürülməsi üçün başlanğıc olduğunu bildirib.

Eyni zamanda İsrail hökuməti Qəzza üzərində tam hərbi nəzarət planını təsdiqləyib. Ordu hazırda şəhərin təxminən 75 faizinə nəzarət etdiyini və bir milyonadək fələstinlinin məcburi köçkünə çevriləcəyini açıqlayıb. On minlərlə ehtiyat hərbçi yenidən xidmətə çağırılıb.

Qəzza müharibəsi artıq 23 aydır davam edir. 2023-cü ilin 7 oktyabrında HƏMAS-ın İsrailin cənubuna hücumu ilə başlayan müharibə, BMT-nin avqust ayında bölgədə “rəsmi aclıq vəziyyəti” elan etməsi ilə yeni humanitar böhrana çevrilib. Baş nazir Netanyahu isə həm daxili, həm də beynəlxalq təzyiqlərə baxmayaraq, hələ də müharibəni bitirməyə hazır olmadığını göstərir.