İsrail ordusu HƏMAS hərəkatının Siyasi Bürosunun sabiq rəhbəri Yəhya əs-Sinvarın şəxsi mühafizəçilərindən birinin ötən bazar ertəsi Xan Yunisdə həyata keçirilən əməliyyat nəticəsində öldürüldüyünü elan edib. İsrail ordusunun bəyanatına görə, hədəf alınan şəxs HƏMAS-ın hərbi qanadı olan "İzzəddin əl-Qəssam Briqadaları"nın "Nüxbə" (Xüsusi Təyinatlı) bölməsinin üzvü Rizq Süheyl Əbu Şəhmədir. O, 7 oktyabr 2023-cü il hücumu zamanı "Reim" hərbi bazasına təşkil edilən basqında iştirak edib.
"7 Oktyabr"ın liderlərindən kimlər sağ qaldı?
"Nüxbə" bölməsinin digər bir üzvünün də öldürüldüyünün bildirildiyi bəyanatda Əbu Şəhmə İsrail qüvvələrinə qarşı planlar hazırlamaqda, atəşkəsi sistemli şəkildə pozaraq HƏMAS-ın hərbi imkanlarını yenidən bərpa etməyə cəhd göstərməkdə ittiham olunub və hava zərbəsinin bu təhdidi aradan qaldırmaq məqsədilə endirildiyi iddia edilib.
HƏMAS-ın yerli mənbələri təsdiqləyib ki, Əbu Şəhmə Qəzza zolağının cənubundakı Xan Yunis düşərgəsinin sakini olub və vaxtilə Sinvarın təhlükəsizliyini təmin edən "Nüxbə" bölməsində bölük komandiri vəzifəsini icra edib.
Əyyaşdan-Sinvara… İsrail tərəfindən öldürülən HƏMAS liderləri kimlərdir?
Mənbələrin verdiyi məlumata əsasən, Əbu Şəhmə 7 oktyabr hücumunda, habelə israillilərin əsir götürülərək qısa müddət saxlanılmasında iştirak edib. Mənbələr qeyd edib ki, Sinvarın mühafizəsini növbə ilə həyata keçirən bir çox şəxs İsrailin birbaşa hədəfli əməliyyatları, ictimai yerlərdə endirilən zərbələr və ya digər "Qəssam" döyüşçüləri ilə birlikdə həyata keçirdikləri hücumlar zamanı öldürülüb. Bu mühafizəçilər təkcə Sinvarın yaşadığı Xan Yunisdən deyil, Rəfah kimi digər bölgələrdən də seçilirdi.
Qəzza müharibəsində casus amili nə qədər aktualdır?
Mənbələrdən biri bildirib ki, Sinvar digər rəhbərlərdən fərqli olaraq xüsusi xidmət orqanının əməkdaşları əvəzinə "Nüxbə" bölməsinin yaxşı təlim keçmiş döyüşçülərinin onu müşayiət etməsinə üstünlük verirdi. Lakin HƏMAS-dan olan digər mənbələr bildiriblər ki, Sinvarı daimi müşayiət edən və heç vaxt dəyişdirilməyən əsas mühafizəçilər onun ən yaxın ailə çevrəsindən ibarət idi. Onların arasında Qəzzadakı müharibə zamanı əmisinin yanında həlak olan qardaşı oğlu İbrahim Məhəmməd əs-Sinvar da var idi. Xatırladaq ki, Yəhya əs-Sinvar 2024-cü ilin oktyabrında Rəfah şəhərinin Təl əs-Sultan məhəlləsində İsrail əsgərləri ilə qəfil toqquşma zamanı öldürülmüşdü.
Əl-Sinvar və Nəsrullahın öldürülməsi arasında fərq nədir?
Sui-qəsdlərin intensivləşməsi narahatlığı
Bu fonda Qəzza zolağındakı Fələstin qruplaşmaları İsrailin qarşıdakı dövrdə hərbi qanadların rəhbərlərini və nüfuzlu səhra komandirlərini aradan qaldırmaq məqsədilə sui-qəsd zərbələrini intensivləşdirəcəyindən ehtiyat edirlər.
Cümə axşamı günorta saatlarında İsrail Xan Yunisdəki bir çadıra endirdiyi zərbə ilə HƏMAS fəallarından olan Əzzam əl-Abadləni qətlə yetirib, Qəzza şəhərinin Şati düşərgəsindəki digər zərbə zamanı isə bir nəfər ağır yaralanıb.
"Qəssam Briqadaları" və "İslami Cihad"ın hərbi qanadı "Qüds Briqadaları" komandir və üzvlərinə xəbərdarlıq təlimatları göndərərək, xüsusilə oktyabrda keçiriləcək Knesset seçkiləri ərəfəsində İsrailin sui-qəsdləri genişləndirmək niyyətində olduğunu bildiriblər.
Bu təlimatlar İsrailin "Kanal 13" televiziyasının yaydığı məlumatdan sonra verilib. Həmin xəbərdə Baş Qərargah rəisi Eyal Zamirin Qəzzada sui-qəsd əməliyyatlarını artırmaq barədə orduya göstəriş verdiyi bildirilmiş, eyni zamanda təhlükəsizlik mənbələri seçkilərə görə ordunun lüzumsuz döyüşlərə cəlb olunmasının fəsadları barədə xəbərdarlıq etmişdi. Qəzzada hərbçilərə baş çəkən Zamir Qəzzanın tam tərksilah edilməsinə və 7 oktyabr hücumunun bütün iştirakçılarının məhvinə qədər əməliyyatların davam edəcəyini vurğulamışdı.
Fələstin qruplaşmalarının iki səhra nümayəndəsi bildirib ki, verilən təlimatlarda komandirlərin yerlərini dərhal dəyişməsi, heç bir rabitə vasitəsindən istifadə etmədən təhlükəsiz sığınacaqlara keçməsi, gizlənməsi və İsrail kəşfiyyatının nəzarətində ola biləcək yaxın ətraf ilə bütün əlaqələrin dayandırılması tələb olunub. Hətta etibarlı sayılan rabitə vasitələrindən belə istifadə qəti qadağan edilib.
Mənbələrin sözlərinə görə, təlimatlarda Benyamin Netanyahu hökumətinin tam atəşkəs razılaşmasını qəbul etmək istəmədiyi və seçkilər ərəfəsində sui-qəsdlərə əl atacağı qeyd olunur. İsrailin bir gündə bir neçə hədəfi vuran genişmiqyaslı əməliyyatlar keçirəcəyi və ya eyni vaxtda müxtəlif nöqtələrə qəfil zərbələr endirəcəyi ehtimal edilir.
HƏMAS-ın siyasi mənbəsi bildirib ki, istər Qəzzada, istərsə də İordan çayının qərb sahilində fələstinlilərin qanı hər zaman İsrail hökumətlərinin öz hakimiyyətini qoruması üçün bir vasitə rolunu oynayıb və Netanyahu bu xətti ən çox təşviq edən şəxslərdəndir. Mənbə Knesset seçkilərindən sonra belə mövcud reallığın dəyişəcəyinə və atəşkəs pozuntularının dayanacağına inanmadığını qeyd edib.