BAKI,VOA, Fərid Mikayılov
Türkiyənin milli müdafiə naziri Yaşar Gülər NATO-nun Ankara konfransında çıxışı zamanı müasir təhlükəsizlik konsepsiyasının artıq ənənəvi sərhəd müdafiəsi ilə məhdudlaşmadığını bildirib.
VOA xəbər verir ki, Gülər qeyd edib ki, beynəlxalq diqqət, xüsusilə də ABŞ başda olmaqla, getdikcə Hint-Sakit okean regionu istiqamətinə yönəlir.
Bildirilib ki, Hindistan–Pakistan və Pakistan–Əfqanıstan xəttində artan gərginliklər yeni təhlükəsizlik riskləri yaradır.
Nazir vurğulayıb ki, müasir dövrdə təhlükəsizlik anlayışı yalnız sərhədlərin qorunması ilə məhdudlaşmır, eyni zamanda kritik infrastrukturun müdafiəsi, cəmiyyətin dayanıqlılığı, kibertəhlükəsizlik və informasiya manipulyasiyalarına qarşı mübarizə kimi sahələri də əhatə edir.
Qeyd olunub ki, bu dəyişikliklər dövlətlərin müdafiə strategiyalarını yenidən nəzərdən keçirməsini və çoxşaxəli təhlükəsizlik mexanizmlərinin formalaşdırılmasını zəruri edir.