BAKI, AzerVoice, Nailə Babazadə

ABŞ Prezidenti Donald Tramp Türkiyə Prezidenti Rəcəb Tayyib Ərdoğanla keçirdiyi telefon danışığını yüksək qiymətləndirib.

AzerVoice xəbər verir ki, Davosda keçirilən Dünya İqtisadi Forumuna qatılmaq üçün Ağ Evdən ayrılarkən mətbuatın suallarını cavablandıran Tramp, görüşün "çox yaxşı keçdiyini" bildirib.

Türkiyə Prezidentliyi Kommunikasiya İdarəsindən verilən məlumata görə, liderlər ikitərəfli münasibətlərlə yanaşı, regional və qlobal məsələləri də müzakirə ediblər. Prezident Ərdoğan Türkiyənin Suriyadakı hadisələri yaxından izlədiyini və bu ölkənin birliyi, bərabərliyi və ərazi bütövlüyünün Türkiyə üçün strateji əhəmiyyət kəsb etdiyini vurğulayıb. Görüşdə həmçinin İŞİD-lə mübarizə və Suriya həbsxanalarındakı terrorçuların vəziyyəti ətrafında fikir mübadiləsi aparılıb. Ərdoğan terrorçulardan təmizlənmiş və daxili sabitliyi bərpa olunmuş Suriyanın regionda sülhün qarantı olacağını qeyd edib.

Görüşün digər mühüm mövzusu Qəzzada sülhün təmin edilməsi istiqamətində atılan addımlar olub. Prezident Ərdoğan bu məsələdə Türkiyənin ABŞ ilə koordinasiyalı şəkildə fəaliyyət göstərməyə davam edəcəyini bildirib. O, həmçinin Qəzza Sülh Şurasına dəvət edildiyi üçün Donald Trampa təşəkkürünü ifadə edib. Liderlər bölgədəki gərginliyin azaldılması üçün birgə diplomatik səylərin artırılmasının vacibliyi barədə razılığa gəliblər.