BAKI,VOA,Yusif Şərifzadə

ABŞ və İran arasında müharibə fonunda Hörmüz boğazından kommersiya daşımalarının əhəmiyyətli dərəcədə azalması İordaniyanın Əqəbə limanında tranzit yüklərin həcminin kəskin artmasına səbəb olub.

VOA xəbər verir ki, liman rəsmilərinin açıqlamalarına və terminal məlumatlarına əsasən, tacirlər Hörmüz boğazından keçən marşrutlara alternativ yollar axtarırlar.

Əqəbə Konteyner Terminalının kommersiya üzrə baş direktoru Anqşuman Mustafi bildirib ki, konteyner daşımalarında artım təxminən 5 faiz təşkil edib. Onun sözlərinə görə, artım əsasən Şam bölgəsinə və xüsusilə İraqa göndərilən yüklərin həcminin artması ilə bağlıdır.

Terminal iyul ayında yaydığı açıqlamada bildirib ki, 2026-cı ilin ilk yarısında tranzit yüklərin həcmi ötən ilin eyni dövrü ilə müqayisədə 155,1 faiz artıb.

ABŞ və İsrailin fevralın sonunda İrana qarşı hücumlarından sonra bölgədə müharibənin başlaması Hörmüz boğazında təhlükəsizlik risklərini artırıb. Nəticədə əvvəllər dünya neft daşımaları və digər ticarət üçün əsas marşrutlardan biri olan boğazdan keçən gəmi axını kəskin azalıb.

Ticarət iştirakçıları yaranmış vəziyyətə cavab olaraq alternativ marşrutlara, o cümlədən Suriya üzərindən keçən yollara yönəlirlər.