BAKI,VOA,Yusif Şərifzadə
İran İnqilab Keşikçiləri Korpusu (SEPAH) Hörmüz boğazının şərq hissəsində ABŞ-yə məxsus MQ-9 pilotsuz uçuş aparatının vurulduğunu açıqlayıb.
VOA xəbər verir ki, SEPAH yaydığı bəyanatda hava hücumundan müdafiə qüvvələrinin yeni və inkişaf etmiş sistemdən istifadə edərək ABŞ istehsalı olan uzunmənzilli MQ-9 pilotsuz aparatını zərərsizləşdirdiyini bildirib.
İran tərəfinin məlumatına görə, aparat Hörmüz boğazı üzərində uçarkən raket atəşi ilə vurulub və Fars körfəzinə düşüb.
Hadisə ABŞ və İran arasında gərginliyin yenidən artdığı bir vaxtda baş verib. Bundan əvvəl ABŞ Prezidenti Donald Tramp İordaniyada yerləşən ABŞ qüvvələrinə qarşı İran hücumlarına cavab veriləcəyini açıqlamışdı.
İran isə bazar günü ABŞ-nin Larək adasına endirdiyi zərbələrə cavab olaraq İordaniyadakı ABŞ bazalarını hədəfə aldığını bildirib.
ABŞ tərəfi isə SEPAH-ın MQ-9 pilotsuz uçuş aparatının vurulması barədə iddiasını hələ təsdiqləməyib.