BAKI,VOA,Yusif Şərifzadə

ABŞ vitse-prezidenti Cey Di Vens bildirib ki, Prezident Donald Trampın Xark adasının “tamamilə məhv edilməsi” ilə bağlı sosial şəbəkə paylaşımı İran tərəfinə mesaj xarakteri daşıyır.

VOA xəbər verir ki, Vens bazar ertəsi jurnalistlərin Trampın paylaşımı ilə bağlı sualına cavab olaraq prezidentin sosial şəbəkələrdən istifadə edərək bəzən fərqli üslub seçdiyini bildirib.

Vens qeyd edib ki, Tramp hərbi əməliyyatlarla bağlı qərarları sosial şəbəkə vasitəsilə elan etmədiyini deyən ilk şəxs olardı, lakin onun bu paylaşımı İran rəhbərliyinə yönəlmiş mesajdır.

Tramp bazar günü sosial şəbəkədə Xark adası ilə bağlı qısa paylaşım edib və paylaşım süni intellekt vasitəsilə hazırlanmış video görüntü ilə müşayiət olunub.

ABŞ rəsmisi bildirib ki, gecə həyata keçirilən zərbələr zamanı ABŞ ordusu Xark adasını hədəfə almayıb. İran rəsmisi isə Trampın paylaşımını “gülünc” adlandırıb.

Xark adası İranın enerji ixracı baxımından strateji əhəmiyyət daşıyır. ABŞ–İsrail müharibəsi başlamazdan əvvəl İranın neft ixracının təxminən 90 faizinin bu ada vasitəsilə həyata keçirildiyi bildirilirdi.

ABŞ rəsmisinin sözlərinə görə, iyulun sonlarından sonra ilk məlum hərbi zərbələr zamanı ABŞ qüvvələri Larək adasında yerləşən iki raket qurğusunu hədəfə alıb.