BAKI, AzerVoice, Səməd Əyyubov
ASELSAN-ın açılacaq 14 yeni müəssisəsi istehsal gücünü artıracaq və təxminən 4 min nəfər üçün yeni iş yeri yaradacaq.
AzerVoice xəbər verir ki, bu sözləri Türkiyə prezidenti Rəcəb Tayyib Ərdoğan ASELSAN-ın Gölbaşı kompleksində keçirilən tədbirdə çıxış edərkən deyib.
“Son illər hava hücumundan müdafiə sistemlərinin nə qədər önəmli olduğunu görürük. Öz müdafiə sistemini inkişaf etdirməyən heç bir ölkə gələcəyinə inamla baxa bilməz. Müdafiə qabiliyyətimiz ölkənin təhlükəsizliyi üçün əsas faktordur” – deyə, o vurğulayıb.
Ərdoğan “Polad Günbəz” layihəsinin həyata keçirilməsinin vacibliyini qeyd edib və ASELSAN əməkdaşlarına təşəkkürünü bildirib:
“Bu gün biz üç mühüm addımı birlikdə atırıq. ‘Polad Günbəz’ layihəsi, ASELSAN-ın 14 yeni müəssisəsinin açılışı və Oğulbəy kompleksinin təməli. Bütün bu addımların uğurlu olmasını arzulayıram. ASELSAN ailəsinə 50 il ərzində töhfə verən hər kəsə təşəkkür edir, bütün əməkdaşlara minnətdarlığımı bildirirəm.”
Prezident həmçinin Türkiyə ordusunun inventarına yeni texnikaların daxil olacağını açıqlayıb.
“Ordumuzun inventarına üç ədəd ‘Hisar’ orta mənzilli hava hücumundan müdafiə sistemi və 21 ədəd vasitə daxil olacaq. ‘Korkut’ hava hücumundan müdafiə sistemi də qoşunların istifadəsinə veriləcək. ‘Polad Günbəz’ layihəsi ilə yeni mərhələyə qədəm qoyacağıq. Layihədə ASELSAN mühüm rol oynayır. Süni intellekt dəstəkli idarəetmə sistemi sayəsində yüzlərlə hava müdafiə kompleksi vahid bir sistem kimi işləyə biləcək” - deyə, Türkiyə Prezidenti bildirib.
Dövlət başçısı Oğulbəy kompleksinə qoyulacaq sərmayənin Türkiyə müdafiə sənayesi tarixində bir dəfəyə edilən ən böyük sərmayə olacağını da qeyd edib.
“Oğulbəy kompleksi 1,5 milyard dollarlıq sərmayə ilə inşa olunacaq və ölkə tarixinin bir dəfəyə edilən ən böyük müdafiə sənayesi sərmayəsi olacaq. ASELSAN üçün 6 500 dönümlük ərazi ayrılıb ki, bu da əvvəlkindən iki dəfə böyükdür. Oğulbəy kompleksi bölgənin ən qabaqcıl texnologiya mərkəzlərindən birinə çevriləcək və ASELSAN-ın istehsal gücünü iki dəfədən çox artıracaq. 2026-cı ilin ortalarında ilk müəssisənin istifadəyə verilməsi planlaşdırılır. Bu, sadəcə bina tikintisi deyil, texnologiya və istehsal mərkəzinin qurulmasıdır. Müəssisə gənclərə innovativ mühitdə işləmək və layihələrini reallaşdırmaq imkanı yaradacaq” - deyə, Ərdoğan bildirib.
Qeyd edək ki, 2024-cü ilin avqustunda istifadəyə verilən “Polad Günbəz” kompleksi yerli və milli silah sistemləri, radarlar, elektro-optik cihazlar, rabitə modulları, komanda və idarəetmə məntəqələri ilə təchiz olunub. Layihə strateji obyektlərin, hərbi hissələrin və şəhərlərin hava hücumlarından müdafiəsini təmin edir.