BAKI,VOA,Yusif Şərifzadə

Pakistan, Səudiyyə Ərəbistanı və Türkiyə regionda “davamlı sülh və sabitliyə nail olmaq” məqsədilə birgə fəaliyyət göstərəcəklərini açıqlayıblar.

VOA xəbər verir ki, Pakistan Xarici İşlər Nazirliyinin yaydığı birgə bəyanata əsasən, üç ölkə üçtərəfli müdafiə sazişi çərçivəsində gərginliyin azaldılması səylərinə dəstək vermək və böhranların sülh yolu ilə həllini təşviq etmək üçün əməkdaşlıq edəcək.

Bəyanatda qeyd olunub ki, Pakistan, Səudiyyə Ərəbistanı və Türkiyə regional təhlükəsizlik və sabitliyin möhkəmləndirilməsi istiqamətində kollektiv addımlar atacaq.

Tərəflər bu məqsədlə Səudiyyə Ərəbistanında katibliyin yaradılması barədə qərar qəbul ediblər. Yeni qurum üç ölkə arasında müdafiə və təhlükəsizlik sahəsində əməkdaşlığın əlaqələndirilməsinə xidmət edəcək.

Bildirilib ki, katibliyə ilk üç il müddətində Pakistan tərəfindən təyin olunacaq baş katib rəhbərlik edəcək.

Məkkə Birgə Müdafiə Sazişindən sonra qəbul edilən bu qərarlar üç ölkə arasında təhlükəsizlik əməkdaşlığının institusional əsaslarının formalaşdırılması istiqamətində ilk addımlar kimi qiymətləndirilir.