BAKI, AzerVoice, Nailə Babazadə

İranın Xarici İşlər naziri Abbas Əraqçi bildirib ki, İran və ABŞ arasında hazırda heç bir danışıqlar aparılmır və Vaşinqton real, ədalətli dialoq üçün zəruri iradəni nümayiş etdirməyib.

AzerVoice xəbər verir ki, France 24 kanalına verdiyi müsahibədə Əraqçi qeyd edib ki, ABŞ Prezidentinin xüsusi elçisi Stiv Vitkofla əlaqə kanalları mövcud olsa da, hazırda heç bir danışıqlar prosesi başlamayıb. O əlavə edib ki, müxtəlif vasitəçilər mesajları ötürməyə davam etsələr də, ABŞ tərəfi real danışıqlara hazır deyil.

Əraqçi vurğulayıb ki, İran həmişə dialoqa açıq olub və 2015-ci ildə nüvə sazişinə imza atılıb. Lakin ABŞ və İsrailin 2025-ci ildə hücumlarından sonra danışıqlar dayandırılıb. Nazir qeyd edib ki, danışıqlar diktə deyil, qarşılıqlı maraqlara əsaslanan dialoq olmalıdır.

Əraqçi həmçinin bildirib ki, ABŞ administrasiyası birtərəfli tələblərdən imtina edib ciddi dialoqa hazır olduqda, İran dərhal danışıqlara başlamağa hazırdır. Hazırda isə belə bir iradə müşahidə olunmur.

O əlavə edib ki, son həftələrdə Stiv Vitkofla və ya digər ABŞ rəsmiləri ilə əlaqə yoxdur, lakin ABŞ tərəfi real danışıqlara hazır olduqda, əlaqə kanalları dərhal aktivləşdiriləcək.